Berlin/Mnichow (dpa/SN). Hladajo na prognozy za wólby w Saksko-Anhaltskej je so Charlotte Knobloch, předsydka Israelitiskeje­ kultusoweje wosady Mnichow a Hornja Bayerska, wčera słowa jimała.­ W interviewje z magacinom Stern wotmołwi 93lětna na prašenje, hač hodźi so wuwiće stronow AfD a NSDAP přirunować: „Na jenaku runinu stajeć to njemóžemy, ale přirunować.“ Tež NSDAP je swój čas jako mała nakromna strona dźěłać započinała a hranicy politiskich móžnosćow wuspytowała. „Eksaktnje to samsne stawa so nětko z AfD. Strona rosće, ćim radikalnišo wustupuje“. W jeje žiwjenju je mnoho hrózbnych stronow dožiwiła, přispomni Knobloch, „žana pak tak strašna njebě, kaž to AfD tuchwilu je“.

Berlin (dpa/SN). Joachim Rukwied, prezident Němskeho burskeho zwjazka DBV, wopisa na wčerawšej nowinarskej konferency zwjazka w Berlinje lětuše žně jako přesłapjace. Wosebje w južnej a zapadnej Němskej su so pobrachowace spadki negatiwnje na wunoški burow wuskutkowali. DBV wočakuje lětsa cyłkowne žně žita we wobjimje něhdźe 41,9 milionow tonow. To je sydom procentow mjenje hač loni. Rukwied pak na to skedźbni, zo mějachu němscy ratarjo loni z 45 milionami tonami žita wosebje sylny wuslědk.

Regionalne rozdźěle žnjow we wšelakich kónčinach republiki běchu lětsa wosebje widźomne, prezident DBV naspomni. Hladajo na hubjenu hospodarsku situaciju mnohich ratarskich zawodow žada sej burski zwjazk financnu podpěru ze stron Zwjazka a EU. Mjez druhim namjetuje, zo EU planowane přiražki za hnojenje wot 60 milionow na 180 milionow eurow zwyši. Direktne agrarne subwencije měła EU k 80 procentam město w decembrje hižo w oktobrje na burow wupłaćić.

Wšědny dźeń a w medijach widźu přeco wjace młodostnych, kotřiž ekstremistiske powěsće a symbole šěrja a so w typiskej modźe po měsće a šulach pohibuja. Direktorka Phillipa Melanchtonoweho gymnazija w Budyšinje ma prawdźepodobnje styki do prawicarsko-ekstremistiskeho miljeja; šulske blida a sćěny Serbskeho gymnazija Budyšin běchu za mój šulski čas zdźěla z hokatymi křižemi „pyšene“. Prawicarski ekstremizm zadobywa so dźeń a bóle do srjedźizny towaršnosće a šulskeho žiwjenja. Reagujo na to wuwichu wjacore sakske ministerstwa zhromadny „Akciski plan přećiwo ekstremizmej na šulach“, kotryž su wčera w kabineće předstajili. Prewenciski plan wopřijima zažne demokratiske kubłanje, dalekubłanja wučerjow, podpěru šulow we wobchadźe z ekstremizmom kaž tež spěchowanje wědomja nastupajo symbole tajkeho razu. Nadźijam so, zo so starosće šulerjow skónčnje chutnje bjeru a šule plan swědomiće realizuja. Mila Dźisławkec

Drježdźany (dpa/SN). Po wobličenjach chorobneje kasy Barmer diagnosticěruje so pola nimale kóždeho štwórteho dźěsća w Sakskej rěčne mylenje. W lěće 2024 registrowachu pola 23,8 procentow sakskich dźěći w starobje dweju do pjeć lět tute mylenje wuwića. W lěće 2005 wučinješe podźěl potrjechenych hišće 19,8 procentow. Něhdźe 8,3 procenty dźěći ma mylene motoriske wuwiće. To je 26 procentow wjace hač w lěće 2005. Zasadnje su hólcy bóle potrjecheni hač holcy. Za statistiske wobličenja su fachowcy Barmer anonymizowane daty Zwjazkoweho statistiskeho zarjada wuhódnoćili.

Hladajo na wuslědki skedźbnja sakska krajna jednaćelka Barmer Claudia Beutmann na to, zo trjebaja dźěći wot spočatka žiwjenja nadosć składnosćow sej hrajkać, rěčeć a so hibać. Tute aktiwity nje­spěchuja jenož wuwiće, ale tež socialne kompetency dźěći. Při tym su spušćomne socialne kontakty njeparujomne. Wosobinsku podpěru dźěći digitalne medije narunać njemóža. „Runje w prěnich žiwjenskich lětach su realne interakcije a zhromadne dožiwjenja jara wažne“, Beutmann wuzběhnje.