Iran a Israelso atakowałoj
Bamž na wopyće w Španiskej
Namołwjeja Putina z Ukrainu jednać
Pašinjan wólby dobył
Wjetšina Armenjanow wčera Europje přichilenemu kandidatej hłós dała
Jerjewan (dpa/SN). We wčerawšich wólbach swojeho parlamenta su Armenjenjo tež wo tym wothłosowali, kotry kurs kawkaska republika w přichodźe změje: Zapadny z wusměrjenjom na EU abo wuchodny z wusměrjenjom na Rusku. Po prěnich wólbnych wuslědkach je strona Ciwilne zrěčenje dotalneho premierministra Nikola Pašinjana z 49,8 procentami wólby jasnje dobyła. Na druhim městnje leži strona Sylna Armenska proruskeho předewzaćela a miliardara Samvela Karapetjana ze 23,3 procentami. Nawodnica wobkedźbowarskeje misije OSZE Farah Karimi wopisa wólbny bój w minjenych tydźenjach, kiž bě połny mjezsobnych wumjetowanjow a wobwinowanjow, jako „ekstremnje polarizowacy“. Zastupjer armenskeho knježerstwa wumjetuje ruskemu knježerstwu, zo je w Ruskej bydlacych Armenjanow za to zapłaćiło, zo k wólbam do swojeje domizny jědu a tam za proruske strony hłosuja. Armeniske zarjady su w tutym zwisku wjacore chłostanske jednanja zahajili, jasne dopokazy za wobwinowanje pak dotal prezentowali njejsu.
Hura? Skerje nic!
Aue: Prawicarski kandidat podležał
To a tamne (08.06.26)
Nowy hinduistiski templ su wčera po dwaceći lětach planowanja a natwara w Berlinskim měšćanskim dźělu Neukölln poswjećili. Twarjenje ze swojej 17 metrow wysokej kupolu je najwjetši templ dohromady něhdźe 100 000 hinduwow w Němskej. Na swjatočnosći wobdźělištaj so mjez druhim Berlinska senatorka za hospodarstwo Franziska Giffey (SPD) a indiski wulkopósłanc Ajit Gupte.
Na swojej pytanskej wuprawje za zhubjenym w lěsnym pasmje zapadnje wulkoměsta Orléans je sobotu helikopter francoskeje policije znjezbožił. Jedyn zastojnik při tym zemrě, dalšaj so ćežko zraništaj. Policisća běchu wjacore hodźiny z helikopterom po puću. Přičiny njezboža dotal znate njejsu. Młodostneho, za kotrymž běchu slědźili, su mjeztym namakali.
Potomnik a přećel Serbow Charles Wukasch njeboh
Z Texasa je njedawno dóšła powěsć, zo je 2. nalětnika 2026 slawist a docent dr. Charles Wukasch w starobje 85 lět w Austinje zemrěł. Wón bě potomnik serbskich wupućowarjow a přećel łužiskich Serbow. „Ja sym Serb“, so wón hordźe wuznawaše a so rady tež Korla Wukaš mjenowaše.
Charles Wukasch narodźi so 3. awgusta 1940 w texaskej stolicy Austin, hdźež tež wotrosće a do lutherskeje šule chodźeše. Mać bě irsko-jendźelskeho pochada, nan pak měješe swójbne korjenje w Němskej. Jako 13lětny hólc wot nana zhoni: „We are Wendish“ (Smy serbscy). Z tym bě zajim zbudźeny, kiž čas žiwjenja traješe. Jako gymnaziast napisa swój prěni nastawk wo Serbach w Texasu.
Žada sej krućiše předpisy
Luxemburg (dpa/SN). Němska chce Ukrainjanam, kiž móhli wojować, puć do Europskeje unije poćežować. Zwjazkowy nutřkowny minister Alexander Dobrindt (CSU) rjekny na zetkanju ministrow EU, zo chce wotpowědny namjet podpěrać. Při wuradźowanjach su so nutřkowni ministrojo pječa hižo na to dojednali, zo chcedźa z mužemi w starobje 23 do 60 lět přichodnje hinak wobchadźeć. Zwjazkowy kancler Friedrich Merz (CDU) bě sej hižo loni wot ukrainskeho prezidenta Wolodomyra Zelenskeho krućiše předpisy za muži žadał, kotřiž chcedźa kraj wopušćić.
Nowe sankcije přećiwo Kubje
Washington (dpa/SN). USA zawjedźe nowe sankcije přećiwo prezidentej Kuby Miguelej Diazej, čłonam jeho swójby a wšelkim zarjadam. Z tym powyši US-knježerstwo ćišć na socialistiske knježerstwo karibiskeje kupy. Jako přičinu naprawow mjenuja USA bój přećiwo terorizmej. Zdobom je prezident USA Donald Trump w minjenych měsacach časćišo wo tym rěčał, zo chce kraj „přewzać“. Z retomasom nowych sankcijow a blokadu dowožowanja wolija drje chce sej hospodarsku a politisku změnu w kraju wunuzować.
