Z Texasa je njedawno dóšła powěsć, zo je 2. nalětnika 2026 slawist a docent dr. Charles Wukasch w starobje 85 lět w Austinje zemrěł. Wón bě potomnik serbskich wupućowarjow a přećel łužiskich Serbow. „Ja sym Serb“, so wón ­hordźe wuznawaše a so rady tež Korla Wukaš mjenowaše.

Charles Wukasch narodźi so 3. awgusta 1940 w texaskej stolicy Austin, hdźež tež wotrosće a do lutherskeje šule chodźeše. Mać bě irsko-jendźelskeho pochada, nan pak měješe swójbne korjenje w Němskej. Jako 13lětny hólc wot nana zhoni: „We are Wendish“ (Smy serbscy). Z tym bě zajim zbudźeny, kiž čas žiwjenja traješe. Jako gymnaziast napisa swój prěni nastawk wo Serbach w Texasu.