Tež Nižozemska z turněra won
Podobnje kaž němskej je so wčera rano tež nižozemskej koparskej wubrance zešło. Wona dyrbješe mustwo z Marokka porazyć, zo by dale do přichodneho koła přišła. We wurunanym duelu so tempo hry hakle na kóncu druheho połčasa pospěši. Cody Gakpo třěli w 72. mjeńšinje wrota za Nižozemjanow. Team z Marokka dyrbješe nětko reagować. Tež w tutej hrě padnychu wurunanske wrota pozdźe, a to w 91. mjeńšinje přez Marokkočana Issa Diopa. W podlěšenju měješe Marokko šansu hru rozsudźić, tola zwrěšći na nižozemskim wrotarju Bart Verbruggenje. Tak dyrbještej mustwje tež tutu hru z třělenjom jědnatkow rozsudźić. Te je Marokko na kóncu 3:2 dobyło.
To a tamne (01.07.26)
Bywši bunker Hitlera w Berlinskim měšćanskim dźělu Mitte chce tamniši senat bórze wotstronić. Na arealu bunkera maja nowe bydlenske domy nastać. Pomnikoškitarjo přećiwo planam protestuja, dokelž by so z tym posledni hišće eksistowacy bunker Hitlera z dowójnskeho časa zhubił. Wón pak nima status pomnika, štož je hladajo na jeho zachowanje problematiske.
Z Oscarom wuznamjenjeny dokumentarny filmowc Pawel Talankin je so njemało stróžił, jako po swojim lěće wot New Yorka do Frankfurta n. M. zhoni, zo je lětanska towaršnosć Lufthansa pozłoćenu trofeju „zhubiła“. Při wotlěće njeběchu jemu dowolili, zo ju sobu do kabiny wozmje. Město toho dyrbješe „swojeho Oscara“ jako wačok deklarować a wotedać. Mjeztym je jeho Lufthansa zaso našła. Hdźe, to přeradźić nochce.
Ministrej tójšto domjacych nadawkow dali
Radworska skupina CDU je wčera sakskeho ministra za nutřkowne naležnosće Armina Schustera (CDU) witała. Hłowna tema rozmołwy bě wěstota wšelakich wobłukow, za čož je minister w swobodnym staće zamołwity.
Radwor (SN/BŠe). „Poprawom nima nichtó přičinu skoržić“, zwurazni sakski nutřkowny minister Armin Schuster (CDU) wčera na rozmołwnym kole w Radworskej wohnjowej woborje. Sakske knježerstwo je tójšto do wohnjoškita inwestowało. Ze spěchowanskich programow je tež Radworska gmejna čerpała a sej loni dwě nowej wobornej jězdźidle kupiła. Hladajo na přiběracy problem lěsnych wohenjow w kónčinje wokoło Gohrischskeje hole su prěnje wuspěchi spóznać. W běhu třoch dnjow móžachu tam wudyrjeny woheń zhašeć a to dźakowano nowej technice, Schuster situaciju wopisowaše.
Tež wo kontrolach na mjezach Čěskeje a Pólskeje přitomni wčera diskutowachu. Zamołwity předewzaća zwurazni swoje wobmyslenja, hač su wone dale w dotalnej měrje trěbne. Wjele dźěłaćerjow z Pólskeje přichadźa do Sakskeje na dźěło. Jim su kontrole wobćeženje.
Miliarda přidatnych dochodow
Berlin (dpa/SN). Ze swojich podźělow na předewzaćach je Zwjazk loni cyłkowny dobytk we wobjimje něhdźe 1,1 miliardy eurow měł. To wuńdźe z wotmołwy zwjazkoweho financneho ministerstwa na naprašowanje Lěwicy. Najwjace dochodow přińdźe z podźělow na Němskej Telekom. W etatowym lěće 2025 bě Zwjazk dohromady na dźewjeć předewzaćach wobdźěleny.
W Monacu bomba rozbuchnyła
Monaco (dpa/SN). Z wulkej detonaciju je wčera wječor před zachodom bydlenskeho domu w Monacu bomba rozbuchnyła a tři wosoby chutnje zraniła. Po informacijach tamnišich zamołwitych zarjadow je mjez nimi jedyn z najbohatšich předewzaćelow Ukrainy. Hač běše eksplozija planowany atentat na njeho, to nochcychu wobkrućić. Widejo wěstotneje kamery pokaza w času krótko do eksplozije muža, kotryž nachribjetnik blisko duri wotstaji.
Iran pomoc Europy wotpokazuje
Swětowe mišterstwo je za koparjow němskeje wubranki nimo. Faworitej ...
Stade: Njeskutk ze šěsć mortwymi
Wot jutřišeho bencin zaso dróši
Wupad wučby redukować
Drježdźany (dpa/SN). Sakska chce wupad wučbnych hodźin na šulach redukować. To připowědźi kultusowy minister Conrad Clemens (CDU) krótko do spočatka prózdnin wčera w Drježdźanach. Tuchwilna kwota wupada wučinja dźewjeć procentow.
Mjez druhim změja studenća wučerstwa přichodnje móžnosć, cyłolětny praktikum na šulach přewjesć. Nastupajo zasłužbu chce Clemens lěpše zastopnjowanje fachowych wučerjow z jenož jednym předmjetom kaž tež přidružnikow zawjesć. Mnóstwo wučbnych hodźin referendarow chce sakske ministerstwo za kultus wot 12 na 14 hodźin wob tydźeń zwyšić. Ministerstwo z toho wuchadźa, zo jeničce z tutej naprawu, kotraž ma hižo wot přichodneho šulskeho lěta płaćić, cyłkownu wuwučowansku kapacitu wo 150 000 hodźin zwyši.
Zaso štyri lěta čakać!
Frustrěrowacy kónc za Němsku
Kajka bě to dramatiska hra dźensa w nocy! Němska drje je bul a hru nimale cyły čas kontrolowała. Najebać to docpě přećiwnik w šěsnaćifinalu mišterstwa – wubranka z Paraguayja – w 42. mjeńšinje prěnje wrota. Po přestawce poradźi so němskemu koparjej Kaijej Havertzej w 54. mjeńšinje zastatk wurunać. W podlěšenju hry, w 102. mjeńšinje, zhłójčkowa Jonathan Tah samo druhe wrota za němski team. Tola sudnik zniči wšu euforiju němskich fanow a němskeho mustwa, dokelž wrota pozdatneho foula na wrotarju dla po pruwowanju wideja zaso wróćo sćahny. Potajkim dyrbještej mustwje hru z třělenjom jědnatkow rozsudźić. Paraguayscy hrajerjo mějachu lěpše čuwy a na kóncu dobychu.
