Štóž je so wčera hižo nawječor rozsudźił swój telewizor zaswěćić, móžeše swětowu mištersku hru mjez Španiskej a Kap Verde sćě­hować. Poprawom wšak sym z toho wuchadźał, zo budźe hra jednostronska a zo španiske mustwo jako jasny dobyćer­ hrajnišćo wopušći, wšako steji wone na druhim městnje na swětowej lisćinje­ FIFA, mustwo z Kap Verde porno tomu na 67. městnje. Tola tu so něšto sta, štož běše poprawom njepředstajomne. Za mnohich přiwisnikow kopańcy je Španiska samo faworit čo. 1 tohole swětoweho mišterstwa. Mustwo ma jedyn z najlěpšich kadrow swěta, z youngstarami kaž 18lětnym Lamine Yamalom abo 23lětnym Nicom Williamsom.

Tola za mustwo wokoło trenarja Luisa de la Fuente hra hinak wotběža, hač běše sej předewzało. Wone dźeržeše bul w swojich rynkach a steješe nimale cyłu hru při šěsnatce mustwa Kap Verde. Tola woprawdźite šansy wrota třělić Špani­čenjo lědma mějachu. Z kóždym mu­žom afriske „underdog-mustwo“ konsekwentnje cyłu hru zakitowaše a skićeše přećiwnikam jenož mało městna. Tak zawěsćichu sej nowačcy turněra wuběrny wuslědk 0:0 přećiwo faworitej.

Hape Kerkeling, znaty němski komikar a awtor, je w online-peticiji, w kotrejž jeho jako zwjazkoweho prezidenta namjetuja, dotal 100 000 wot 200 000 trěbnych hłosow docpěł. Na prašenje, hač sej přicpěwa, najwyše statne zastojnstwo w Němskej woprawdźe wukonjeć, wón praji: „Hdyž sej ludźi bliže wobhladam, kotřiž tuchwilu we wodźacych funkcijach na swěće skutkuja, zwažu sej haj prajić!“

Somaliskemu sudnikej Omarej Artanej, kotremuž njeběchu USA zajězd do kraja dowolili, zapłaći FIFA połnu mzdu, tež hdyž so na swětowym mišterstwje w kopańcy njewobdźěli. Kelko sudnicy dokładnje zasłuža, zhonja hakle na kóncu turněra, zdźěli koparski zwjazk. FIFA je Omara Artana nimo toho jako sudnika supercup-finala mjez mustwomaj Paris Saint-Germain a Aston Villa dnja 12. awgusta in Salzburgu powołała.

Vatikan (B/SN). Najmjeńši stat swěta so bórze kompletnje ze solarnej milinu zastara, podkładźe hižo wot lěta 2025 płaćiwe zrěčenje z Italskej. Twar hoberskeje fotowoltaikoweje připrawy, kotryž je bamž Franciskus nastorčił, nastanje na płoninje 420 hektarow – dźesać króć tak wulkej kaž je 44 ha wulka ležownosć Vatikanskeho stata. Z připrawu móže Vatikan samo Rom dźělnje sobu zastarać.

Cyrkwinske wuměłstwo

Linz (B/SN). Dekanka na fakulće za filozofiju a wuměłske wědomosće uniwersity w Linzu prof. Ilaria Hoppe zwěsća, zo je cyrkwinske wuměłstwo zaso jara aktualne. Wuměłcy su so stajnje hižo z nabožinami zaběrali, kaž Wassily Kandinsky, Marc Chagall, Tilmann Riemenschneider abo Michael Triegel. Kak wuměłcy swoje twórby zhotowjeja wotwisuje wot nadawkidawarjow.

Nabožinska mnohotnosć