Direktor čěskeho awtotwarca Škoda Klaus Zellmer je swój wotstup wozjewił. Najpozdźišo wot klětušeho 1. winowca nawjeduje Volvo. Je to konkurent w branši, kotryž słuša chinskemu koncernej Geely.

Mladá Boleslav/Wolfsburg (SN/LuNo). Minjeny tydźeń je awtomobilowy koncern VW šok dožiwił, jako je předsyda předstejićerstwa Škoda Klaus Zellmer swoje zastojnstwo złožił. Jeho nowe skutkowanišćo­ je wot přichodneho lěta šwedski Göteborg, hdźež chce firmu Volvo­ nawjedować. Němc, kiž je so w Bayerskej narodźił, je 59 lět stary a hakle loni běše nowe dźěłowe zrěčenje w Mladá Boleslavje hač do lěta 2028 podpisał. Swój nětčiši rozsud wujasni diplomatisce: „Wjeseli mje, zo směm so předewzaću Volvo we wažnym wokomiku jeho wuwića přidružić.“