Tež po zwrěšćenju (po španiskich zakonjach prawnisce njepłaćiweju) referendumow wo njewotwisnosći Katalanskeje (w lětomaj 2014 a 2017) a wěstym woćichnjenju masoweho narodneho hibanja njepopušćeja tamni patriotiscy aktiwisća, so dale wo nje prócować. To je so tež jasnje pokazało składnostnje Narodneho dnja Katalanskeje (Diada Nacional de Catalunya), kotryž tam kóžde lěto 11. septembra w zwisku z róčnicu poražki njewuspěšneho narodneho zběžka 1714 přewjeduja.

Mjenowany podawk regionalne katalanske knježerstwo a wjacore narodne institucije zhromadnje organizuja. Wuraznje je so lětsa w tym zwisku kulturna njeknježerstwowa organizacija CIEMEN z namołwu „Sym tu. Smy tu. Za přitomnosć a přichod: Njewotwisnosć“ angažowała. „Přeprošamy was 11. septembra dróhi Barcelony, Girony a Amposty pjelnić, dokelž hladajo na wužadanja, kotrež na kraj čakaja smy tu a njepopušćimy!“