Nowej přijimarni ćěkancow w Drježdźanach a Lipsku planowanej
Wojerecy (AK/SN). Sylny přirost ćěkancow tež w Hornjej Łužicy Saksku dale a bóle wužaduje. Tohodla chcedźa z nowymi rjadowanjemi předewšěm gmejny a wokrjesy w tej naležnosći wolóžić. Što je dokładnje předwidźane, rozłožichu wčera na Wojerowskim forumje pod hesłom „Komunalne winowatostne nadawki – Kusaja poslednjeho psy?“. Přeprosył bě kubłanski skutk za komunalnu politiku Sakskeje, mnozy zajimcy su přišli.
„Trjebamy rozumne koordinowanje w Sakskej. Loni bě swobodny stat 130 milionow eurow za naležnosće azyla nałožił, lětsa hižo 270 milionow. Zapřijate su twarske nałožby“, podšmórny nutřkopolitiski rěčnik frakcije CDU w krajnym sejmje Christian Hartmann.
Tuchwilu přebywa w Sakskej něhdźe 20 000 požadarjow azyla w prěnich přijimarnjach. Cyłkownje 4 506 požadarjow bu wotpokazane. W přijimarnjach bydli 2 847 azyl pytacych, z nich 136 w Zhorjelcu a 160 w Mišnje. Azylowe domy w Budyšinje, Wojerecach a Kamjencu njejsu tu wobkedźbowane, dokelž njejsu žane přijimarnje.