W němskej stolicy knježitej optimizm a zdobom skeptika

Athen/Berlin (dpa/SN/K). Skónčnje je tak daloko: Grjekske knježerstwo a mjezynarodni pjenjezydawarjo su dojednanje wo tym docpěli, kajke maja w přichodnych lětach zaměry grjekskeho budgeta być. Tak ma w krizy tčacy kraj klětu primarny nadbytk 0,5 procentow nutřkokrajneho bruttoprodukta (BIP) wupokazać a hač do 2018 hač na 3,5 procentow so zestopnjować. Lětsa smě Athen hišće deficit 0,25 procentow BIP načinić. Primarny nadbytk woznamjenjeja ekonomojo budget bjez płaćenja danjow.

Grjekska a zastupnicy Europskeje unije a Mjezynarodneho měnoweho fondsa (IWF) jednaja tuchwilu móhłrjec permamentnje wo wuměnjenjach za třeći pomocny paket hač do 86 miliardow eurow, kotryž ma kraj před statnym bankrotom zachować. Rjad wažnych dypkow pak njeje přeco hišće jasny, na přikład dokładny wobjim pomocy, nadrobnosće nastupajo saněrowanje bankow a priwatizowanje wšelkeho statneho swójstwa. Grjekski financny minister Euklid Tsakalotos je optimistisce zwuraznił, zo „bórze“ k cyłkownemu dojednanju dóńdźe.