Zwjazk planuje tuchwilu poł miliona eurow mjenje podpěry załožbje

Berlin/Budyšin (SN/at). Zwjazkowe knježerstwo je tónle tydźeń naćisk etata za lěto 2016 parlamentej zapodało. Zwjazkowy sejm je jón w prěnim wuradźowanju wobjednał a dźensa wuběrkej posrědkował. Z łužiskeho wida překwapja, zo planuje Zwjazk po dotal předležacych ličbach­ swój podźěl k financowanju Załožby za serbski lud porno minjenymaj lětomaj z 8,215 milionami eurow wo poł miliona eurow redukować. Prěnja reakcija z Berlina njeje dołho na so čakać dała. „Lěwica sej žada, skrótšenja so wzdać. Nawopak, financowanje serbskeje załožby ma wobstajne być“, zdźěli łužiska zapósłanča zwjazkoweho sejma Caren Lay (Lěwica). Wona skedźbni na to, zo trjebaja serbske institucije skutkowne a planujomne financowanje, město toho zo steja zas a zaso před eksistencnym prašenjom.