Berlin (dpa/SN/K). Zwjazkowa tajna słužba (BND) je daloko do lěta 2013 wažne instancy europskich kaž tež dalšich partnerow wobčušlała. Tole rozprawja telewizija ARD. Při tym njeje jeno selektory ameriskeje tajneje słužby NSA wužiwała, ale tohorunja wjele tysac swójskich zasadźała. Brizantna naležnosć bě wčera wječor předmjet tajneho schadźowanja parlamentariskeho kontrolneho gremija, na kotrymž so tež prezident BND Gerhard Schindler wobdźěli. Po informacijach dźenika Berliner Zeitung je tajna słužba komunikaciju spřećelenych krajow EU z wjele tysac problematiskimi selektorami „wotposłuchała“. Po tym zo bě něhdyši sobudźěłaćer NSA Edward Snowden swój čas šamału wobčušlensku praksu Američanow wotkrył, je BND na přikaz­ tehdyšeho šefa zarjada kanclerki Ronalda Pofalle (CDU) ze swojimi wotpowědnymi aktiwitami přestał.