Prěnje wobnowjenske naprawy hižo tónle měsac zahaja
Budyšin (SN/CoR). Hdyž nazyma kaž tučasnje swoje skerje njepřijomne šěre a mokre mjezwočo pokazuje, je wopyt w muzeju powabliwiši hač wuchodźowanje po lěsu. Štóž pak wo tym rozmysluje, w blišim času zaso jónu do Budyskeho Serbskeho muzeja hić, dyrbi sej to prawje zaplanować. Spontanje znajmjeńša njemóžeš dom wot 16. nazymnika do 4. hodownika wopytać, dokelž budźe w tym času poprawom za zjawnosć zawrjeny. Jeno přizjewjene skupinske wodźenja kaž tež wozjewjene zarjadowanja tam w tym času přewjedu. Konkretnje chcedźa nětko dwě rumnosći muzeja přetwarić. Zakładnje pak słušeja tele aktualne wobnowjenske naprawy k šěršemu planej, muzej na wšelakich runinach krok po kroku modernizować. Tak su hižo loni internetnu stronu wobnowili, nowy touchscreen skići informacije k triptychonej „Hołdowanje serbskim wótčincam“ Ante Trstenjaka a awdioguide wjacerěčnje po trajnej wustajeńcy přewodźa. Na słuchopřewodniku za dźěći tež dźěłaja.