Wirtuozowka wopytowarjow wospjet wobkuzłała
Budyšin (SN/bn). „Njewidźomny hłós“ je titul, kotryž bě sej Serbski ludowy ansambl za prěni sinfoniski koncert swojeje aktualneje hrajneje doby wuzwolił. Hesło hodźi so jako pokazka na hóstnu solistku rozumić, wšako zdadźa so zynki, kajkež Carolina Eyck ze swojeho teremina wukuzłuje, woprawdźe kaž z powětra wzate. Powitawši dohromady něhdźe 600 wopytowarjow rozłoži wirtuozowka na hłownym jewišću Němsko-Serbskeho ludoweho dźiwadła w wušiknej dwurěčnosći serbsce a němsce, kak wysokosć a intensitu tonow wobwliwuje, hdyž z rukomaj w – njewidźomnych – elektromagnetiskich polach swojeho instrumenta za nimi „łóji“. Z hižo standardnej sadu „A tak jednorje to je“ krótku demonstraciju zakónči, kotruž zadźiwany publikum z mjezyaplawsom mytowaše. Zhromadnje ze smyčkarjemi Serbskeje komorneje filharmonije pod nawodom Kathariny Dickopf zahra na to 4. sadźbu „Metsa Happa“ ze swojeje kompozicije „Fantasias“ a kruch „Stigma integrum concerto“ Jana Bělka, kotraž we wersiji za tule wobsadku prěni raz w Budyšinje zaklinči. Nimo toho předstajichu „Kantilenu čo.
Wustajeńca wuměłstwa a rjemjesła
W Bórkowach kirbsowe duchi šerili
Wjeršk lětušich kirbsowych tydźenjow w Bórkowach su minjenu sobotu při tamnišej Bismarckowej wěži woswjećili. Za kóždolětne wubědźowanje kirbsowych duchow móžachu hosćo tam swój wuprózdnjeny, kreatiwnje rězbarjeny a wozdebjeny kirbs wotedać. Z pisanej, potajnej a druhdy tež trašacej zabawu su wuměłcy małych a wulkich wopytowarjow zahorili. Mjez nimi běštej tež Greta Raab a Maria Hoffmann (prědku wotlěwa) w swojimaj mystiskimaj kostimomaj. Z dohromady 52 kirbsow móžachu hosćo digitalnje na šmóratku swój wosobinski faworit wuzwolić.
Foto: Michael Helbig
Wulki oratorij we wulkej wobsadce zwoprawdźili
Po twórbomaj „Wětrnik a časy“ a „Hrodźišćo“ su brigadnicy a hosćo „Wulkotnu wodu“ prapremjernje předstajili
Najswojorazniša kajkosć kompozicijow Měrćina Weclicha je, zo zadobudu so spěšnje do wucha, z kotrehož so přespěšnje njezhubja. Tomu njeje nastupajo nowy oratorij „Wulkotna woda“ hinak, tež hdyž so tónraz telko wuchačow njewukopa, kelkož předchadźacej twórbje podobneho formata wopytowarjam wobradźištej. Hłowna přičina drje je změna wažneje pozicije: Prěni raz njespisa aranžement Malte Rogacki, z kotrymž je Weclich w běhu lětdźesatkow bjezmała slepje rozumjace so wuměłstwowe partnerstwo dowuwiwał, ale młody multiinstrumentalist a producent Johannes Gerstengarbe. Wulkich stopow sej wědomy drje bě sej wón předewzał, originalnej klawěrnej partiturje swójski rukopis spožčić a so při tym přewuteptanych harmoniskich šćežkow wzdać.
Program hač do kónca tydźenja
Zběrka wušła
Muzej nowy koncept prezentował
Serbski institut je na swojej wčerawšej klawsurje w Serbskim domje składnosć wužił a so dźeń do prěnjeho zarywa za twar noweho Serbskeho foruma wědy na Lawskim arealu wo koncepciji za nowu trajnu wustajeńcu Serbskeho muzeja wot 2030 na nowym městnje informował.
Budyšin. Direktorka Serbskeho muzeja Christina Boguszowa a kurator dr. Jędrzej Soliński předstajištaj něšto wjace hač 40 institutnikam plan za modularnje natwarjenu wustajeńcu a temowe wobłuki. Inspiraciju běchu sej muzejownicy při wopytach wšelakich muzejow w tu- a wukraju nazběrali.
Team běrowa dr. Ulrich Hermanns z Münstera, kotryž je nadawk za koncepciju wustajeńcy dóstał, prezentowaše na wulkim płatnje 3D-turu po nutřkownych rumach nowotwara na dwěmaj etažomaj. Tak dóstachu přitomni zaćišć wo rumnostnych wuměnjenjach a wuhladachu hižo rumnosće za zhromadne wužiwanje. Z pomocu KI Moodboards sposrědkowa jim běrow dohlad do dźěła na koncepće. Zakładna ideja je zběraćelski muzej, w kotrymž so objekty inscenuja. Rěč běše wo 1 300 eksponatach.
Maika Dźisławkec podpěruje LND
Wot spočatka septembra podpěruje Maika Dźisławkec z Dobrošic wotrjad rozšěrjenja w Ludowym nakładnistwje Domowina. Po lětsa złoženej maturje ze wukonowymaj kursomaj serbšćina a stawizny na Serbskim gymnaziju Budyšin chce so Maika na rozdźělnych powołanskich polach wuspytać. W šulskich prózdninach je hižo w redakciji Serbskich Nowin dźěłała a staraše so wo scannowanje fotow za archiw LND. We wotrjedźe rozšěrjenja podpěruje sobudźěłaćerjow při pisanju zličbowankow, předawanju knihow a dodawanju Serbskeje protyki. Tak dóstanje dohlad do nadawkow wšědneho dnja nakładnistwa, za kotrež je so hižo zahe zajimowała. Jako šulerka je wona w Dobrošicach a wokolinje za małki kapsny pjenjez nowiny roznošowała. Z tym so wona wo to postara, zo kóždy zajimc dypkownje nowostki do domu dóstanje. Hač do klětušeje meje chce wona w nakładnistwje dźěłać. W lěću chce sej zhromadnje z přećelom z nalutowanymi pjenjezami swět wotkryć a so na jězbu do najwšelakorišich krajow podać. Po tym ma wotpohlad, so na studij pola policije abo cła podać, na kotryž so hižo pilnje přihotuje.
Slawisća so w Jenje schadźowali
Jena (LM/SN) Kóžde tři abo štyri lěta schadźuja so zastupjerjo němskeje slawistiki, stajnje na druhim městnje. Lětsa wuhotowaše Friedricha Schillerowa uniwersita w Jenje tak mjenowany 15. dźeń slawistiki. Zarjadowanje pak njetraješe jenož jedyn dźeń, ale poprawom cyłe štyri dny, a to wot minjeneje srjedy hač do předwčerawšeho. Zetkanje zahajichu swjatočnje z wjacorymi powitanskimi narěčemi a přednoškom. Mjez druhim porěči tam tež prof. dr. Thede Kahl, direktor Instituta za slawistiku a kawkaziske studije w Jenje. Po tym sćěhowaše bifet, kotryž bě hudźbnje wobrubjeny.
