W muzeju hudźbnje do Ameriki pućuja
Budyšin (SN/MiR). Pod hesłom „Klasika w zymje“ zarjaduje towarstwo Klassikunst z.t. z Berlina z podpěru Załožby za serbski lud a dalšich w Budyšinje hudźbny festiwal. Organizatoriske nitki ma wuměłča Franziska Pietsch w horšći. „Sym so do žurle jeje wulkotneje akustiki dla zalubowała a začuwam w njej wosebitu energiju, štož je mje k tomu pohnuło, koncertny rjad wuwić,“ praji Berlinjanka, kotraž ma swójbne korjenje w Zhorjelcu kaž tež w susodnej Čěskej republice. Wona so za město Budyšin w zwisku z muzejom zajimuje, wosebje za poměr dweju kulturow a rěčow, serbskeje a němskeje. Zdobom wjaza wona duch słowjanskich narodow do poskitka, kotryž so mjeztym třeći raz, a to stajnje w zymje, wotměwa.
Krabatowy młyn z nałožkami wabi
Ptački picować, słódne sroki z ćěsta pjec a dalše zajimawostki zhonić a dožiwić móža swójby sobotu a njedźelu w Krabatowym młynje w Čornym Chołmcu. Z ptačokwasnym kóncom tydźenja zahaji zarjadnišćo swoju lětušu Młynsku zymu.
Brigada w Hejnicach zwučowała
1. serbska kulturna brigada je wospjet wulkotny kónc tydźenja w čěskich Hejnicach dožiwiła.
Rano zahe podachmy so zašły pjatk z busomaj do čěskeho klóštra a zetkawanskeho centruma w Hejnicach. Zažiwić so dołho njetrjebachmy, proby so direktnje započachu. Wšako smy wosrjedź přihotow na oratorij „Wulkotna woda – zwuki, słowa, wobrazy“. Wosebity wjeršk za nas běše wopyt Měrćina Weclicha, komponista oratorija, kaž tež Maćija Bulanka, kiž projekt fotografisce přewodźa. Wulku podpěru dawa nam Johannes Gerstengarbe, kiž je hižo z wjacorymi serbskimi hudźbnymi skupinami dźěłał a z nami oratorij přihotuje. Zhromadnje z wuměłskej nawodnicu a dirigentku brigady Judit Kubicec a dalšimi pomocnikami smy sej hudźbny zakład nadźěłali. Nětko mamy dobry přehlad wo cyłej twórbje.
Wězo njemějachmy jenož proby. Wječory běchu pisane, lóštne a hudźbnje wobrubjene. Smy dołho hromadźe spěwali a hudźili. Sobotu smy samo spontany wustup na wotewrjenju wuměłskeje wustajeńcy w klóštrje wuhotowali. Nimo brigady zahori tež skupina našich hólcow publikum ze swójskim přinoškom.
Zapust tójšto hosći přiwabił
Pjatk chcedźa w dźiwadle zaso hrać
W Budyskim Němsko-Serbskim ludowym dźiwadle je minjenu srjedu při přehladanju signaloweje připrawy za kur wulka škoda nastała. Byrnjež w domje woheń resp. kur njewudyrił, je wohnjoškitna připrawa reagowała. Při tym je ca. 6 000 litrow wody wuběžało.
Budyšin (SN/BŠe). Kak wulka škoda w Budyskim Němsko-Serbskim ludowym dźiwadle je, njeje hišće jasne. Wjednistwo NSLDź z toho wuchadźa, zo drje budźe to šěsćcyfrowa suma. Prěnje fachowe firmy běchu minjene dny w domje, zo bychu škodu posudźowali. Tole zdźěli nowinska rěčnica Gabriele Suschke na naprašowanje. Mjez druhim poby tam štwórtk rano fachowa firma, kotraž je swětłomjetaki wotewzała, zo by konkretnu škodu zwěsćiła a je zreparowała.
Dobyćerjow literarneho wubědźowanja mytowali
Budyšin. W serbskim dorostowym literarnym tworjenju dominuja holcy a žony. To je dopóznaće pjatkowneho mytowanja dobyćerjow literarneho wubědźowanja 2025, kotrež je Załožba za serbski lud wospjet zhromadnje z Ludowym nakładnistwom Domowina (LND) přewjedła. Wot lěta 1976 maja młodostni a dorosćeni do 35 lět kóžde druhe lěto móžnosć, swoje basnje kaž tež krótku a dlěšu prozu a dramatiku zapodać. Ze zapodatych přinoškow wuzwoli jury dobyćerjow we wotpowědnych kategorijach.
Chór Lipa zwučuje za oratorij Nalěćo
Pančicy-Kukow. Na swojej hłownej zhromadźiznje je předsydstwo chóra Lipa zawčerawšim w awli šule Ćišinskeho w Pančicach-Kukowje na minjene lěto zhladowało a so wo předewzaćach w nowym lěće dorozumiło. Kónc lěta měješe towarstwo 84 čłonow. 60 z nich su aktiwni spěwarjo, kotrychž nawjeduje Jadwiga Kaulfürstowa. Předsyda Beno Waurich přednjese wěcnu rozprawu a zwěsći, zo zhladuje chór na lěto połne aktiwitow. Městopředsydka Katka Baierowa gratulowaše jubilaram: dwaj spěwataj hižo 35 lět w Lipje, dalši zhladuje na 25 lět aktiwneho sobustawstwa.
Jewišćo NSLDź přepławjene
Budyšin (SN). Při přepruwowanju wohnjoškitneje připrawy srjedu dopołdnja we wulkim domje Němsko-Serbskeho ludoweho dźiwadła (NSLDź) w Budyšinje su so njejapcy wodopryskački zapinyli a hłowne jewišćo, orchestrowu hrjebju, spódnje jewišćo kaž tež pódlanske rumnosće přepławili. To wozjewi NSLDź wčera w zdźělence a w socialnych medijach. Technikarjam na městnje so w běhu někotrych mjeńšin poradźi, wodu wotstajić. Najebać to bě so dohromady něhdźe 6 000 litrow wody po domje wulało.
Muzej loni z 15 000 wopytowarjemi
Budyšin (SN/bn). Serbski muzej w Budyšinje je loni dohromady něhdźe 15 000 wopytowarjow přiwabił. W přirunowanju z lětom 2024 mjeńša ličba je předewšěm wuslědk mjenje swójskich zarjadowanjow a programow. Cyłkownje su „połnje do koncipowanja wulkoprojekta noweje trajneje wustajeńcy zapřijeći sobudźěłaćerjo“ loni 152 projektow přewjedli. K tomu zwoprawdźichu 20 eksternych eventow, kiž so w statistice njejewja. To běchu kaž na přikład rjad Budyskich komornych koncertow abo zhromadźizny towarstwow.
Nakładnistwo pyta rjane serbske jutrowne jejka za pohladnicy
W Ludowym nakładnistwje Domowina chcedźa lětsa nowu zběrku pohladnicow z motiwami serbskich jutrownych jejkow zestajić a wudać. Dotalna zběrka dźesać tajkich kartow je w lěće 2018 wušła a je mjeztym wupředata. Tuž pyta LND z podpěru Spěchowanskeho kruha za serbsku ludowu kulturu wuměłcow a wuměłče, kiž bychu swoju zběrku profesionalnje fotografować dali a ju zjawnosći předstajili. „Wažne nam při tym je, zo maja debjerjo wuski wosobinski zwisk k serbskej rěči a kulturje“, zdźěli jednaćel nakładnistwa Syman Pětr Cyž. Motiwy jejkow měli wšu pisanosć a mnohostronskosć serbskich jutrownych jejkow pokazać. „Wšojedne hač jedna so wo wóskowane, bosěrowane, škrabane abo wužrawane jejka – kóžda technika je zajimawa“, měni za projekt zamołwita lektorka Andrea Nowakowa.
Zajimcy njech nakładnistwu hač do 23. januara maksimalnje pjeć probowych fotow swojich najrjeńšich jejkow sposrědkuja (z mejlku: abo z whatsappku: 0152 - 592 684 82).
