Rěčny kurs połny
Budyšin (SN). Lětuši lětni kurs Serbskeho instituta (SI) za serbsku rěč a kulturu je wuknihowany. 43 zajimcow w starobje mjez 21 a 74 lětami z dźesać krajow je so za njón dohromady přizjewiło. Najwjace wobdźělnikow přińdźe z Němskeje, Pólskeje a Čěskeje. Dalši zajimcy su z Awstriskeje, Tadźikistana, Ukrainy a USA kaž tež ze Serbiskeje, Słowakskeje a Słowjenskeje. Něhdźe połojca wobdźělnikow hišće studuje. Dźěl kursantow chce so powołansce we wobłuku slawistiki ze serbšćinu zaběrać. Druzy maja wosobinske přičiny, kaž na přikład serbskich prjedownikow abo serbskeho partnera.
Poprawom měješe so doba přizjewjenja za kurs 1. meje skónčić. Tola wotpowědny formular je SI hižo dźeń prjedy z interneta wzał, dokelž běchu wšitke městna wobsadźene. Kurs wotměje so wot 24. julija do 8. awgusta w rumnosćach Serbskeho internata a Serbskeho gymnazija w Budyšinje.
Zhromadnje na dobrodźěći spěwać
Budyšin (SN/bn). Serwisowy klub Rotary Bautzen/Budyšin wuhotuje lětsa dalšu, chórowu akademiju. Za to pyta znowa za spěwarkami a spěwarjemi kóždeježkuli staroby, kiž „nochcedźa so snano kruće do ansambla integrować, ale rady raz na wobmjezowany čas w chórje sobu spěwać“. W srjedźišću ma wjeselo nad hudźbu a zhromadnym spěwanjom stać. Runočasnje spěchuje so dalekubłanje w hudźbnej teoriji a hudźbnych stawiznach. Nimo toho poskićuja zajimcam składnosć, za čas chórowych probow wosobinske hłosowe kubłanje přijimać.
Zaměr akademije je – nimo hižo mjenowaneho wjesela kaž tež šěrjenja wědy a kmanosćow w zwisku z hudźbu – 11. oktobra wuhotować beneficny koncert w Budyskej Michałskej cyrkwi, a to na dobro swětoweje kampanje we wobłuku programa „Polio Plus“. Z njej angažuje so zjednoćenstwo Rotary International pod hesłom „End Polio Now“ přećiwo spinalnej mortwicy (Kinderlähmung). Před lětomaj w Budyskej cyrkwi Marje a Marty wuhotowany, tehdyšu akademiju zakónčacy koncert na dobro dźěsćownje-syrotownje w Lwiwje bě nimale 5 200 eurow wunjesł.
Nowe serbske wuměłstwo w Lipsku
Nowe serbske wuměłstwo je domizna Bernharda Schippera. Wustajeńca pokazuje nětko přehladku třoch lětdźesatkow skutkowanja wuměłca, kiž ma łužiske a serbske korjenje. Zašły štwórtk su ju oficialnje wotewrili.
Šulerjo kniharnju wopytali
„Serbska utopija“ na festiwalu Nysa
Wulke Hendrichecy (SN/bn). Dohromady něhdźe sto přinoškow wopřijima 23. filmowy festiwal Nysa (NFF), kotryž wotměje so wot 26. do 31. meje na cyłkownje 17 hrajnišćach w třikrajowym róžku Čěskeje, Pólskeje a Sakskeje. Festiwal zahaja z filmom „Etwas ganz Besonderes“ (Eva Trobisch) na žurli Gerharta Hauptmannoweho dźiwadła w Zhorjelcu a zakónča ze spožčenjom mytow we Varnsdorfskim měšćanskim dźiwadle. Cyłkownje 49 mjezynarodnych produkcijow wubědźuje so w třoch segmentach wo „Rybički Nysy“, kaž so ze 27 500 eurami dotěrowane statuety mjenuja. Hižo jasny je lawreat čestneho myta, mjenujcy pólski režiser Jan Komasa.
Z Markom Wjeńku so rozžohnowali
Na sylnej žonje spominali
Budyšin (SN/bn). We wobłuku zarjadowanjow na česć a wopominanje dr. Marje Grólmusec wuhotowaštej župa „Jan Arnošt Smoler“ a Zwjazk dźěłarnistwow Němskeje (DGB) minjenu sobotu hudźbno-literarne popołdnjo w Budyskim Serbskim domje. Zdobom spominachu na nim na Marju Kubašec składnostnje jeje 50. posmjertninow. Zazběh tworješe prapremjerna prezentacija wideja rjadu Stawiznak, z kotrymž towarstwo Serbska murja na žortne wašnje prěnje powołanske kročele Marje Kubašec prěnjeje serbskeje wučerki „w konserwatiwnych Chrósćicach“, zwobraznja. Klip šwika předewšěm muži, kotřiž žonam „wyše nadawki“ njepřicpěwaju. Tele nastajenje kaž tež po- resp. wustupowanje přećiwo njemu twori po słowach županki Lenki Thomasoweje paralelu mjez woběmaj žonomaj. Za Kubašec bě to jedna z přičinow, so čas žiwjenja z dóńtom serbsko-katolskeje publicistki a socialistiskeje spjećowarki přećiwo nacionalsocialistiskemu režimej zaběrać. Drje najznaćiši wuslědk toho je jeje w lěće 1960 wušła biografija „Hwězdy nad bjezdnom“, kotraž steješe w srjedźišću literarneho dźěla zarjadowanja.
Składnosć, wo Mari Grólmusec rozmyslować
Tele dny spominamy z wjacorymi zarjadowanjemi na serbsku žurnalistku a spjećowarku přećiwo nacionalsocializmej dr. Marju Grólmusec, kotraž je so 24. apryla před 130. lětami narodźiła.
Serbske baje a powěsće předstajiła
Što je na našich serbskich bajach poprawom to wosebite a čehodla maja wone tež paralele do europskeho wukraja? Mjez druhim wo tym je zawčerawšim kulturna wědomostnica Serbskeho instituta dr. Susanne Hozyna w Lipsku přednošowała.
Lipsk (SN/MG). Zwjazk powědarkow a powědarjow je zhromadnje z towarstwom Erzählraum minjene dny w Lipsku kongres wuhotował, kotryž so z wuměłstwom powědanja zaběraše. Hižo wot póndźele wotměwaja so na zapadźe Lipska we wobłuku wobšěrneho programa mnohe plenumy, dźěłarnički a wječorki powědanja. Kongres přewjeduja kóžde lěto na druhim městnje. Za Lipsk běchu so zamołwići rozsudźili, dokelž „dycha město zdawna hižo duch noweho spočatka“, pisaja w podłožkach za kongres.
Konferenca wo perspektiwach za Łužicu
Budyšin (SN/MiR). Wuradźować a sobu skutkować – to je zaměr konferency towarstwa Łužiske perspektiwy kónc apryla w Budyšinje. Jeje hesło je „Čiń sobu a wobdźěl so!“. Mjez organizatorami je čłon iniciatiwy Raumpioniere Oberlausitz Jan Hufenbach ze syće Bürgerregion Lausitz. Wón rozłožuje: „To je mjeztym třeća konferenca, na kotrejž so z temami přichoda w regionje zaběramy. Tónkróć steji wuradźowanje wo prašenjach za mocu w srjedźišću.“
Wobjednać chcedźa prašenja kaž: Što je móc? Štó ju w demokratiji ma a štó nic? Kak docpějemy zaměrnje tych, kotřiž wo tym rozsudźa, hač hodźa so zaměry wobydlerjow wuspěšnje zwoprawdźić? A štó to scyła je? „To su temy, kotrež ciwilnu towaršnosć tuchwilu sylnje zaběraja.“ Wutoru, 28. apryla, su wot připołdnja w 13 hodź. wšitcy ći na žurlu Budyskeho Kamjentneho domu přeprošeni, kotřiž so wo perspektiwu přichodnych generacijow w regionje starosća. „Nam dźe wo wobdźělenje ludnosće na towaršnostnych procesach jako motor demokratije w krizy kaž tež wo zhromadne pozbudźowanje. Dale je nam wažne, komuny za přichod sylnić“, Hufenbach wuswětluje.
