Přihoty za klětuši festiwal zahajili
Zastupjerjo wjacorych serbskich towarstwow a Chróšćanskeje gmejny su so wčera w tamnišim gmejnskim zarjedźe schadźowali, zo bychu prěnje organizatoriske prašenja za klětuši mjezynarodny folklorny festiwal rozjimali.
Chrósćicy (SN/lmc). Klětu wot 6. do 9. julija wotměje so 16. mjezynarodny folklorny festiwal Łužica – Łužyca – Lausitz. Na wčerawšim organizaciskim posedźenju su so wobdźělnicy na to dojednali, zo chcedźa hižo wupruwowany štyridnjowski koncept wobchować. Tež hižo znate festiwalne městnosće so njezměnja: Štwórtk přewjedźe so festiwal w Budyšinje, pjatk we Wochozach, a sobotu kaž tež njedźelu w Chrósćicach.
W stolicy zajim za serbske jutry budźili
Berlin (SN/MiP). Wóń horceho wóska je wopytowarjow Zastupnistwa swobodneho stata pola Zwjazka w Berlinje sobotu hižo na chódniku před zachodom witała. Knjez domu njedaloko Humboldtoweho foruma, Markus Franke, běše prěni raz wšitkich zajimowanych w stolicy Němskeje na serbske jutrowne wiki přeprosył a mnozy běchu přichwatali, mjez nimi tež někotryžkuli Berlinski Serb.
Wjele hosći je w rumnosći za dołhimi blidami sedźo z wulkej koncentraciju jutrowne jejka wóskowało. Na dohromady třoch dźěłarničkach móžachu sej wobdźělnicy kóždeje staroby pod nawodom serbskich fachowčow rjanu jutrownu debjenku stworić. Nimo toho běchu zamołwići Domowiny a Spěchowanskeho kruha za serbsku ludowu kulturu tež prezentaciskej blidźe zarjadowali, hdźež demonstrowaštej serbskej ludowej wuměłči Weronika Suchowa a Luisa Jurkec rozdźělne techniki wozdebjenja jejkow.
Bena Budarja literarno-hudźbnje počesćili
Budyšin (SN/bn). Pod hesłom „Wokomiki słónca“ wotmě so wčera na wupředatej žurli Serbskeho ludoweho ansambla hudźbno-literarne spomnjeće za Bena Budarja. „Naš serbski spisowaćel“, kaž jednaćel Ludoweho nakładnistwa Domowina Syman Pětr Cyž před lětomaj wumrěteho awtora předstaji, by lětsa wosomdźesaćiny woswjećił. „Jako posmjertny dar swěrnemu serbskemu čitarstwu wuda LND nowy nakład antologije ‚Dźens sym połsta dubow sadźił‘, kotraž sta so pod smužku z cyle nowej knihu“, Cyž na přidatne teksty a fota skedźbniwši zjima a přepoda zestajerce zběrki Měranje Cušcynej dokładowy eksemplar.
„Wortakkord“ rěka Běłowodźanski sociokulturny centrum Telux ...
„Žadyn strach před literaturu“
Staw a přichod serbskeho pismowstwa ćežišćo druheje Serbskeje debaty
Budyšin (SN/bn). „Staw serbskeho pismowstwa je indikator stawa cyłeho serbskeho ludu“, zahaji Lubina Malinkowa wčera citujo Jakuba Barta-Ćišinskeho a Mikławšwa Andrickeho druhe zarjadowanje lětušeho rjadu Serbska debata, kiž wotmě so pod hesłom „Serbska literatura – pozicije a perspektiwy“ na žurli Budyskeho Serbskeho domu. Zhromadnje ze swojej koleginu Theresu Jacobsowej ze Serbskeho instituta, kotryž rjad debatow ze Sakskej krajnej centralu za politiske kubłanje, Serbskimi Nowinami a Załožbu za serbski lud sobu zarjaduje, moderěrowaše wona diskusiju na podiju. Cyłkownje ju něhdźe 70 zajimcow – nimale połojca z nich online – sćěhowaše. Jako prěnjemu přepodaštej Symanej Pětrej Cyžej słowo, kotremuž je „zdźeržeć a dale wuwiwać rěč nadawk a zdobom wizija“ za Ludowe nakładnistwo Domowina, kiž jako jednaćel nawjeduje. Wudawać serbskorěčnu literaturu ma w tym zwisku za wažne, dokelž „rěč ryzy ertnje posrědkować njebudźe dosahać“.
Wuslědki studije předstajiłoj
Podstupim (SN/MiP). Braniborski statny sekretar za wědomosć, slědźenje a kulturu Tobias Dünow (SPD) je zdobom zamołwity za serbske naležnosće kraja. Na krajnu konferencu w Podstupimje je wón wčera społnomócnjenych za serbske naležnosće štyrjoch braniborskich wokrjesow, kotrychž dźěl teritorija w serbskim sydlenskim rumje leži, kaž tež města Choćebuz přeprosył. Zarjadowanje běše njezjawne.
