Migracija mjez zmužitosću a mytosami
Budyšin (CS/SN). Hižo wot 1980tych lět jezuitska słužba za ćěkancow skutkuje, kotraž so jeničce z pjenježnych darow financuje. Spočatnje je so wo tak mjenowanych Boat-People – ćěkancow z Vietnama – starała. Tola tež dźensa ma dźěła dosć. Pater Fabian Rječka je wčera wječor w Budyskim ekumeniskim tachantskim wobchodźe wo swojim dźěle rozprawjał a so pod hesłom „Migracija mjez zmužitosću a mytosami“ z wopytowarjemi rozmołwjał. Referent rozdźěli karty z prašenjemi a wopytowarjo powědachu wo swojich wosobinskich nazhonjenjach a začućach we wobchadźe z temu migracija. Z toho wuwi so čiła rozmołwa. Fabian Rječka je tři a poł lěta w Kolumbiskej přebywał, mjeztym bydli hižo lěto w Berlinje. Z poskitkom rozmołwy pućuje po cyłym kraju, skutkujo po połojcy za słužbu ćěkancam a po druhej jako kapłan. Wón pochadźa z Kulowa a přitomnych tuž tež serbsce postrowi.
Cunje zynki na farskej łuce
Radwor. Na swój tradicionalny lětni koncert je Radworski chór Meja minjenu njedźelu na tamnišu farsku łuku přeprosył. Při rjanym słónčnym wjedrje su dźěći rejowanskeje skupiny Łužičanka program skulojćili.
Wótra hudźba pod hołym njebjom
Kulturnu zahrodu do zymskeho spara spěwali
Dohromady třinaće předstajenjow pod hołym njebjom je Serbski ludowy ansambl (SLA) w lětušej lěćnej sezonje organizował. Kóždu sobotu běše Budyski najwjetši balkon derje wopytany, tola nic tak derje kaž zašłu sobotu.
Budyšin (SN/jp). Při přijomnych, miłych temperaturach je skupina JANKAHANKA na zhromadne spěwanje do kulturneje zahrody při Röhrscheidtowej bašće přeprosyła. Na sobotniše poslednje předstajenje na zahrodźe je tójšto zajimcow přichwatało, zo bychu přijomnu atmosferu z krasnej live-hudźbu dožiwili. Tomas Kreibich-Nawka powita hosći a měnješe, zo tu hišće ženje telko ludźi njebě, kaž sobotu wječor. Dyrbjachu hosći samo domoj pósłać, dokelž by hewak zahroda přepjelnjena była. Wulka ličba zajimcow měješe dwě přičinje. Prěnja bě skupina JANKAHANKA wokoło Józefa Brězana. Woni wuprudźeja dobru naladu, kotraž so na wopytowarjow přenjese a z tym hosći přiwabi. Tamna přičina bě, zo koncertowachu na samsnym dnju kaž staroměšćanski swjedźeń. A tak mnozy wopytowarjo składnosć wužichu, zo bychu dobry cocktail woptali.
LitMiks‘26 wušoł
W Ludowym nakładnistwje Domowina je dalša zběrka rjada „LitMiks“ wušła. Wona wobsahuje 23 twórbow 14 młodych awtorkow a awtorow w starobje mjez 15 a 29 lětami. Woni su so pjera jimali, dokelž chcedźa słyšani być. Pisaja wo tym, na čimž so wjesela, čemu so směja, što jich tyši abo trapi, za čimž so žedźa.
Połojca w zběrce zastupjenych pisacych poskićuje nam woptanku swojich prěnich literarnych wupłodow, płody tamnych su hižo zrališe. Druhe teksty zaso wolóžeja, zabawjeja abo wubudźeja posměwk. LitMiks je wotnětka na předań. Knižnu premjeru planuje LND spočatk oktobra.
Platforma za młodostnych hasnjena
Internetny „Kostrjanc“ je zwjadnył. Platforma, kotruž běštaj Cyril Mark a Korla Baier jako „1. serbsku social media“ stworiłoj, bu nětko wotšaltowana. Załožba za serbski lud je projekt po swojich směrnicach podpěrała.
Serbsko-mjezynarodne zynki z „třěchi“ Łužiskich horin
Budyšin (SN/bn). Ze spěwom „Hory módre, ja was znaju“ zahaja Chór Budyšin prawidłownje swój tradicionalny lěćny koncert na Čornoboze, a tomu tež wčera hinak njebě. Chwalba na tudyše wyšiny z pjera Křesćana Bohuwěra Pfula a Bjarnata Krawca dźě njehodźi so jenož wulkotnje za Dźeń Hornjeje Łužicy, z kotrymž w regionje wot lěta 2014 kołowokoło 21. awgusta na załoženje zwjazka šesćiměstow wopominaja, ale je zdobom idealny zazběh wustupa spěwarkow a spěwarjow ze sprjewineho města na „domjacej horje Budyšina“. Po jeničkej unisono zanjesenej pěsni programa slědowachu připowědźi wotpowědnje wjacore serbske, němske a mjezynarodne wjacehłósne, zdźěla solistisce wudospołnjene sadźby, kaž na přikład „Wudaj so holičo“ (Jan Pawoł Nagel), „Abschied vom Walde“ (Felix Mendlessohn Bartholdy) abo „El grillo“ (Josquin des Prez). Zhromadnje z něhdźe 60 wopytowarjemi zanjese chór nimo toho kanonaj „Dona nobis pacem“ a „Hejo, spann den Wagen an“ (wobě de facto z ludu).
Hudźi na šěsć rozdźělnych pišćałkach
Młody Worklečan Kilian van Dorp je ze swojimi instrumentami na Zwjazkowej runinje chětro wuspěšny
Mnozy starši na tym wobsteja, zo hraje znajmjeńša jedne dźěćo w swójbje instrument. Tute zbožo ma tež Kilian van Dorp. Młody Worklečan njehraje jenož na pišćałkach – tež pišćele a klawěr njejsu jemu cuze. Nimo toho rady programěruje a trenuje prawidłownje pola medijowych skawtow w Budyšinje.
Hudźbna karjera
