Operowy bal klětu pod hesłom kino
Drježdźany (VaŽ/SN). Přichodny bal w Drježdźanskej Semperowej operje, kotryž budźe klětu w februarje, tuchwilu z połnej paru přihotuja. Lěto wob lěto so njeličomne młode pory za casting debitantow požadaja – tak tež lětsa. We wobłuku wulkeju castingow jich jury, kotruž nawjedujetaj rejwarjej Tassilo a Sabina Lax, akribisce pohódnoća. Wonaj staj wot prěnjeho bala lěta 2006 za naročnu choreografiju zahajenskeje reje zamołwitaj. Jury přisłuša dale Annett Hofmann, mandźelska sakskeho ministerskeho prezidenta Michaela Kretschmera. Wona je patronka debitantkow a debitantow. Z něhdźe 300 kandidatow su po dołhimaj dnjomaj castinga 200 młodych ludźi za rejwarki a rejwarjow wuzwolili. 100 porikow debitantow chce publikum 6. februara 2026 w Semperowej operje zakuzłać.
Tójšto wo Malešecach zhonili
Eksperimentalna inscenacija SLA w nowej tradiciji
„Dalina – Neuland“ zwjazuje Wiensku klasiku a ekspresionizm ze satiru a młodźinskim rozswětlerstwom
Serbski ludowy ansambl je swojej nowej tradiciji swěrny wostał a třeći raz za sobu dosć eksperimentelnu nazymsku inscenaciju zwoprawdźił. Dwudźělna a -rěčna produkcija „Dalina – Neuland“ wobsteji ze spěwohry „Die Fischerin“ a z hudźbneje groteski „Ptačk architektki“. Byrnjež so na wjacorych runinach jasnje rozeznawałoj, wutworitej naposledk komplementarny cyłk z wotewrjenym wukóncom.
Poł lětstotka sylzow a dźiwow
Pisany program składnostnje róčnicy wotewrjenja wulkeho domu NSLDź
Budyšin (SN/bn). Němsko-Serbske ludowe dźiwadło je wčera we wobłuku Dnja wotewrjenych duri 50. róčnicu wotewrjenja wulkeho domu woswjećiło. Intendant institucije Lutz Hillmann swjedźeń na dworje dźiwadła zahaji. Powitawši hosći citowaše mjez druhim z narěče, kotruž bě Jurij Brězan składnostnje wotewrjenja napisał: „Njech přećelstwo w jednej rěči rěči, hdyž so w rěčomaj tu rěči!“ Zahajenje wuklinči ze zhromadnje dwurěčnje zaspěwanej „Odu na wjeselo“.
Za Staszel pytaja naslědnicu
Wulke Hendrichecy (SN/bn). Towarstwo Kunstbauerkino zdźěla, zo so Ola Staszel kónc lěta ze swojeho zastojnstwa rozžohnuje. „Po 14 intensiwnych a formowacych lětach, dźesać z nich we wodźacej róli“ jako ko-nawjednica filmoweho festiwala Nysa (NFF) chce wona po swójskich informacijach nowe powołanske puće kročić. Pod jeje nawodom „njeje so festiwal jenož programatisce dale wuwił, ale tež w swojim mjezynarodnym wuprudźenju profilował. Z wulkim angažementom, rozžahłosću za kino a ze sensibelnej žiłku za towaršnostnje relewantne temy je Ola Staszel festiwal přez wužadace časy wjedła a jako kulturnu swětłownju w třikrajowym regionje Němska–Pólska–Čěska etablěrowała“, towarstwo piše.
Festiwal organizowaca skupina pyta wotnětka za naslědnicu resp. naslědnikom. Městno ma so w najlěpšim padźe spočatk decembra wobsadźić. Požadana je „angažowana, nazhonita a kreatiwna wosobina, kotraž chce přichod NFF sobu postajeć“. Wotpowědne wupisanje su mjeztym na internetnej stronje festiwala wozjewili. Zajimcy měli swoje požadanje hač do 31. oktobra zapodać.
Wo knihach a kniharni (10.10.25)
Lěćo je nimo a pisane łopjena rejuja w nazymskim wětrje. Někotryžkuli wužiwa składnosć, zo by ze swójbu w nazymskich prózdninach hišće raz do ćopłeho wotlećał. Tamny přihotuje sej swój wačok a při rjanym wjedrje po blišej wokolinje pućuje. Jako inspiracija a nastork móhła jemu nasćěnowa protyka „Łužica – Łužyca – Lausitz 2026“ słužić, za kotruž je serbski fotograf Maćij Bulank zaso tójšto zajimawych kućikow našeje domizny ze swojej kameru zapopadnył. Někotre motiwy kalendra, kaž wjesele smějace so družki na swjedźenju Božeho ćěła abo dostojny křižerski procesion drje tele dny njewuhladaš. Ale k historiskemu wětrnikej pola Chasowa pućować, so nad pisanym lisćom při Budyskim spjatym jězoru wjeselić abo w Błótach čołmikować při słónčnym wjedrje hišće móžeš.
W Choćebuzu na Minu Witkojc spominali
Choćebuz. Mina Witkojc a jeje přiwuzni stejachu w srjedźišću zetkanja, kiž wotmě so zawčerawšim hladajo na 50. smjertny dźeń basnicy a publicistki 11. nowembra. Cyłkownje 15 zajimcow – mjez nimi pjeć z Bórkow pochadźacych a jedna přiwuzna – so zeńdźe, zo bychu so wo swójbje Miny Witkojc wuměnjeli. Hosćićelka a moderatorka zarjadowanja Stefanie Krawcojc jich powita a na to skedźbni, zo bě Mina Witkojc wěsty čas pola swojeje młódšeje sotry a jeje muža, konditarskeho mištra Karola Tepcza w Choćebuzu bydliła. Hačrunjež steješe w přeprošenju, zo njeměło zarjadowanje być zetkanje ekspert(k)ow, je nimale kóždy a kóžda z přitomnych swoje cyle wosobinske dopomnjenki na basnicu a jeje Bórkowsku wokolinu přinošował.
Móžny nowy format při skale
Miłoćicy (SN/bn). Pod hesłom „Bruchkult – spěwy Łužicy“ wuhotowaše čestnohamtsce skutkowace mustwo wokoło Jakuba Čornaka wčera při Miłočanskej skale hudźbne zarjadowanje we wobłuku Krabatoweho tydźenja. Spěwytwórc Sascha Hollick ze Sepic zahaji so sam na gitarje a banju přewodźiwši koncert ze swójskimi pěsnjemi, z kotrymiž poruča „optimistisce po dolinach žiwjenja kročić“. Po nim wustupowaca šansoneta-gitaristka Steppe und Moor z Rěčic sposrědkowa ze swojimi spěwami raz melancholisce, raz lakonisce, ale stajnje ze suchim humorom žiwjenske stawiznički. Jeje kredo: „Njezabudźće na ćopłotu we wašich wutrobach a na to, być z čłowjekom!“ Na to zamó hosćićel najprjedy w dueće z gitaristom Willyjom Stoyanom a pozdźišo ze spěwarkami skupiny Jacke Schwarz Banda publikum putać. Nimo hižo znatych spěwow, kaž na přikład „Čas słuša nam“, „Weit ist der Weg“ a „Lubosć“ předstaji kopicu nowšich twórbow, kotrež chce přichodnje „na tačel a, snano tež na kaseće“ wozjewić. Digitalnje budu „so wě tež přistupne, ale za to wšak njetrjebaće ničo zapłaćić“.
