Wčera před sto lětami załoži dwanaće młodych mužow we Wulkim Ćisku (dźensa jenož Ćisk) jednotu Serbskeho Sokoła. Kmótřiłoj běštej młodemu cyłkej jednoće z Delnjeho Wujězda a z Komorowa pola Rakec. Zastupjerjo tuteju jednotow běchu na załoženskej zhromadźiznje přitomni a rozłožichu zaměry a nadawki Sokoła. Za starostu wuzwolichu ćěslu Jana Kašpora, za načolnika (tak rěkaše w Sokole zamołwity nazwučowar) dźěłaćerja Korlu Holdera. Dwójce wob tydźeń su potom we wjesnym hosćencu „K zelenemu wěncej“ zwučowali. Hižo poł lěta pozdźišo přewjedźechu prěni sokołski swjedźeń. W pruskej Hornjej Łužicy blisko němskich Wojerec skutkować njebě jednorje. Tohodla spytachu z přednoškami wo stawiznach a kulturje Serbow a z druhimi formami narodne wědomje ludźi skrućeć. Wjeršk w stawiznach jednoty bě druhi zwjazkowy zlět Serbskeho Sokoła w lěće 1927. Na zetkanju wobdźělichu so wšě tehdy wobstejace jednoty – jich bě tón čas 15. Mjez hosćimi bě tež delegacija čěskeho Sokoła z wulkim přećelom Sokoła (kiž bě tež finančny sponsor) Vladimírom Zmeškalom na čole.