Mjeztym zo docpě tydźenja w letiskej stolicy euforija basketbulistow swój wjeršk, zetkachu so tež angažowani dźiwadłownicy w syći „EnAct on move“ z cyłeje Europy w Rize. Zaměr zetkanja w starodawnej Mazā Gilde bě mjezynarodna wuměna wo temje „diwersita“ w amaterskim dźiwadle.
Zetkachu so skupiny z pjeć krajow, zo bychu w dźěłarničkach a přednoškach wšelake dimensije mnohotnosće wuslědźili. Diskutowachu wo jeje wuznamje w mjezynarodnych dźiwadłowych projektach, kaž tež w dźěle jednotliwych skupin.
Wobdźělili su so hosćićeljo letiskeho amaterskeho dźiwadłoweho zwjazka, čłonojo belgiskeho dźiwadła „OPENDOEK“, inkluziwneho kulturneho centruma „Sijraffen“ z Norwegskeje, wuměłča a dźiwadłowy pedagoga ze Słowjenskeje kaž tež zastupjerjo zwjazka němskeho amaterskeho dźiwadła. Mjez nimi bě tež Křesćan Schröter z projekta ZARI – syć za serbsku rěč a regionalnu identitu z Budyšina, zo by perspektiwu wšelakorosće rěčow a mjeńšinow w Europje do diskusije zapřijał.
