Miłoćicy (SN/bn). Pod hesłom „Bruchkult – spěwy Łužicy“ wuhotowaše čestnohamtsce skutkowace mustwo wokoło Jakuba Čornaka wčera při Miłočanskej skale hudźbne zarjadowanje we wobłuku Krabatoweho tydźenja. Spěwytwórc Sascha Hollick ze Sepic zahaji so sam na gitarje a banju přewodźiwši koncert ze swójskimi pěsnjemi, z kotrymiž poruča „optimistisce po dolinach žiwjenja kročić“. Po nim wustupowaca šansoneta-gitaristka Steppe und Moor z Rěčic spo­srědkowa ze swojimi spěwami raz melancholisce, raz lakonisce, ale stajnje ze suchim humorom žiwjenske stawiznički. Jeje kredo: „Njezabudźće na ćopłotu we wašich wutrobach a na to, być z čłowjekom!“ Na to zamó hosćićel najprjedy w dueće z gitaristom Willyjom Stoyanom a pozdźišo ze spěwarkami skupiny Jacke Schwarz Banda publikum putać. Nimo hižo znatych spěwow, kaž na přikład „Čas słuša nam“, „Weit ist der Weg“ a „Lubosć“ předstaji kopicu nowšich twórbow, kotrež chce přichodnje „na tačel a, snano tež na kaseće“ wozjewić. Digitalnje budu „so wě tež přistupne, ale za to wšak ­njetrjebaće ničo zapłaćić“.