Załožba za serbski lud dźesaty króć zasłužbneju Serbow počesćiła
Pančicy-Kukow (SN/JaW). Dźesaty raz je Załožba za serbski lud lětsa serbskej wosobinje za wurjadne zasłužby wo spěchowanje a zachowanje serbskeje rěče a kultury z Mytom Ćišinskeho a Spěchowanskim mytom Ćišinskeho počesćiła. Prezident Sakskeho krajneho sejma dr. Matthias Rößler je myće sobotu na Čerwjenej žurli klóštra Marijineje hwězdy w Pančicach-Kukowje přepodał. Lětsa počesćichu serbskeho žurnalista a publicista Manfreda Laduša z Wětrowa a komponista Sebastiana Elikowskeho-Winklera z Berlina z najwyšimaj wuznamjenjenjomaj serbskeho ludu.
