Prěnja ewaluacija sakskeho zakonja wo kulturnym rumje předleži

Drježdźany (SN/CoR). „Prawo wothłosowanja Załožby za serbski lud w kulturnym konwenće Hornja Łužica-Delnja Šleska ma so dale wobchować.“ To poruča prěnja ewaluacija sakskeho zakonja wo kulturnym rumje, kotrejež wuslědki je statne ministerstwo za wědomosć a wuměłstwo wčera w rozprawje zjawnosći předstajiło. Ewaluaciska dźěłowa skupina dyrbješe na zakładźe stejišća kulturnych rumow na wsy přepruwować, hač wotpowěduje załožbowe prawo wothłosowanja sakskim krajnym wustawkam a Zakładnemu zakonjej. Kritika bě, zo je serbska załožba jenički pad w Sakskej, hdźež smě „demokratisce (bjezposrědnje) njelegitimowany zastupjer“ wo wužiwanju srědkow kulturneho ruma sobu postajeć. Dale kritizowachu, zo bě załožba wospjet zhromadnje z jednym wo­krjesom wothłosowała. Juristiske přepruwowanje sakskeho nutřkowneho a justicneho ministerstwa zwěsći, zo je prawo wothłosowanja załožby hladajo na komunalne wustawki prawnisce w porjadku a Zakładny zakoń njerani.