Sekcija „Heimat / Domownja“ filmoweho festiwala zaběžała

Choćebuz (SN/CoR). Přepjelnjene bě wčera popołdnju Choćebuske „Obenkino“, jako pokazachu tam we wobłuku němsko-serbskeje sekcije „Heimat / Domownja“ 25. festiwala wuchodoeuropskeho filma pod hesłom „Industrija – započatk a kónc“ šěsć dokumentacijow wokoło milinarnje Čorna Pumpa. Wot dobyća k přěhraću socializma – tak móžeš zaćišć wopisować, kotryž je dohlad do 60 lět stawiznow kombinata w publikumje zawostajił. Patetiski duch natwara jedneje z najwjetšich europskich milinarnjow w 1950tych lětach bě runje tak pytnyć kaž optimizm wid do přichoda na wulkotwarnišću města Wojerec. Wot lěsa do zawoda, wot přirody ke kulturje rěkaše tehdy hłowna interpretacija industrializacije Łužicy. Zo maja so za to krajina a wsy woprować, njebě tematizowanjahódne. „Je cyniske, hdyž pokazuja při tym žony w serbskej narodnej drasće, kotrež funkcionarow z chlěbom a selu witaja“, měnješe zamołwita za sekciju dr. Grit Lemke.