FSV Budissa Budyšin – Hertha BSC II 2:3 (2:0)
Zestawa domjacych: J. Jakubov – Patka, Klippel, Pfanne, Čermák, Rosendo, Hoßmang, Hausdorf, Hansch (67. Reher), Walther, Salewski (80. Kral)
Za poslednju domjacu hru lěta 2015 su sej koparjo Budissy Budyšin předewzali, zo přećiwo mustwu U23 Herthy BSC dobudu. Zymne a pancate wjedro postara so wo słabu kulisu 325 přihladowarjow. W prěnim połčasu so předewzaće Budissy połnje poradźi. Hertha bě drje hrajersce lěpši cyłk, před šěsnatku pak jón škit hosćićela přeco zaso zadźerža. Wo wšo dalše staraše so wrotar Jakub Jakubov. Hižo w 16. min. domjacy 1:0 nawjedowachu. Pavel Čermák bě wrota spřihotował a Paul-Max Walther trjechił. Po něhdźe poł hodźinje měješe třělc prěnich wrotow dalšu móžnosć. Wón pak so na trawniku wobsuny a třělwa smaleše snadnje nimo wrotow. W 41. min. Jakubov bul daloko wotkopny a Walther trjechi z třělwu do dołheho kuta k 2:0. Wjeselo w Budyskich rjadach bě wězo wulke.
