Prěnja wersija hornjoserbskeje prawopisneje kontrole je nětko online

Budyšin (SN/CoR). W prócowanju wo digitalizaciju serbskeje rěče z prěnjej elektroniskej wersiju hornjoserbskeje prawopisneje kontrole je po měnjenju zastupjerki direktora Załožby za serbski lud Michaele Mošoweje „wažny měznik docpěty“, kaž w zdźělence rěka. Wot wčerawšeho móža sej zajimcy z interneta pod adresu www.soblex.de prawopisnu pomoc za wužiwanje na swój ličak dele sćahnyć. Wona funguje we wobłuku kompjuterowych programow LibreOffice resp. OpenOffice kaž tež Microsoft Office 2010.

Wuwita bu hornjoserbska digitalna prawopisna kontrola na zakładźe priwatneje iniciatiwy. Wot lěta 2009 zwoprawdźataj programěrarjej Bernhard Baier a Wito Bejmak open-source-projekt w kooperaciji z Rěčnym centrumom WITAJ­, Załožbu za serbski lud a rěčespytnicu dr. Sonju Wölkowej ze Serbskeho instituta. Tež dalši Serbja su přinošowali.