Serbski ludowy ansambl ma nowu serwisowu rumnosć

Budyšin (SN/MWj). Hač za koncert zajutřišim we Łazu, za jedyn z jutrownych programow abo za baletny wječor spočatk apryla w Chrósćicach – zastupne lisćiki­ za předstajenja Serbskeho ludoweho ansambla dóstanu zajimcy wotnětka w jeho nowej serwisowej rumnosći. Wona nasta w zwisku ze saněrowanjom Röhrscheidtoweje bašty a je w jeje přizemju zaměstnjena.

Zachod nadeńdu wopytowarjo při Młynskich wrotach, hdyž du nimo SLA do směra na Michałsku cyrkej. Přez wulkomyslny foyer dóstanješ so do bašty, w kotrejž hosći mjez druhim sobudźěłaćerka Marita Forchowa wita. Wona předawa lisćiki za zarjadowanja SLA a wo nich informuje. Dale zhoniš wot njeje zajimawostki­ wo Serbach a wo serbskich institucijach. K wotpočnjenju přeproša kofejowy róžk, hdźež poskićeja kofejowe wariacije, a to wšo při serbskej hudźbje a we wosebitej historiskej atmosferje Röhrscheidtoweje bašty.