Pokiwy (15.04.16)

Freitag, 15. April 2016
Artikel bewerten
(0 Stimmen)

Dźeń Jurja Brězana

Čorny Chołmc. Składnostnje jeho 100. posmjertnych narodnin wotměje so njedźelu, 17. apryla, wot 15 hodź. w Čornochołmčanskim Krabatowym młynje dźeń Jurja Brězana. Dźěći Čornochołmčanskeje pěstowarnje „Krabat“ program zahaja. Na to Brězan takrjec hišće raz swoju žiwjensku knihu wočini a w fiktiwnej rozmołwje z młodej holcu ze swojeho žiwjenja powěda. Dale budźe na programje wobdźělena Bischofec hudźbna a wuměłstwowa šula z Wojerec. Wšitcy zajimcy su wutrobnje přeprošeni.

Klasiske twórby zaklinča

Hodźij. Koncert Serbskeho ludoweho ansambla „Wobkuzłaca klasika“ dožiwja zajimcy njedźelu, 17. apryla, wot 17 hodź. w Hodźijskej cyrkwi. Orchester SLA a solistce poskića publikumej twórby baroka a klasiki kaž tež hudźbu 20. lětstotka z Italskeje, Awstriskeje a Łužicy. Zastupne lisćiki za dwanaće eurow dóstanjeće při wječornej kasy.

Předstaja knihu

Choćebuz. Choćebuski Serbski muzej přeprošuje na předstajenje dźewjateho wudaća muzejoweho rjadu „Serbske drohoćinki“. Knihu „Wokrjes Sprjewja-Nysa a jeho serbske kulturne stawizny. Stary Choćebuski wokrjes“ prezentuja srjedu, 20. apryla, w 19 hodź. w Choćebuskim měšćanskim muzeju. Dr. Pětš Šurman, Katja Atanasowojc a dr. Alfred Roggan rozłoža wuslědki swojeho slědźerskeho dźěła.

Wopominanje spisowaćela

Budyšin. Swjedźenske zarjadowanje k 100. posmjertnym narodninam Jurja Brězana wotměje so štwórtk, 21. apryla, w 19.30 hodź. w Budyskim Dźiwadle na hrodźe­. Literarno-hudźbny wječor Němsko-Serbskeho ludoweho dźiwadła a Serbskeho ludoweho ansambla přiwobroći so tym a tamnym přeměnjenjam z wida Brězana. Prapremjernje čita so z jeho poslednjeje hry „Gen.Genesis.Nemesis“. Orchester, balet a spěwni solisća SLA literarny program hudźbnje wobrubja. Zaklinča zhudźbnjenja serbskich komponistow na teksty Jurja Brězana, mjez druhim lubosćinskej spěwaj z pjera Jana Cyža.

Wróćo do powołanja

Budyšin. Informaciske zarjadowanje za tych, kotřiž so po přestawce do swojeho powołanja nawróća, wotměje so štwórtk, 21. apryla, wot 9 do 11.30 hodź. w powołanskim informaciskim centrumje Budyskeje agentury za dźěło na Nowosólskej. Myslene je wone za tych, kotřiž su swoje dźěło přetorhnyli, zo móhli małe dźěći hladać abo potrěbnych přiwuznych zastarać. Jim chcedźa mjez druhim rozłožić, kotre móžnosće dalekubłanja a spěchowanja hodźeli so wužiwać. ­Zajimcy njech přizjewja so pod telefonowym čisłom 03591/ 661 410.

Powjedu po měsće

Wojerecy. Historiske wodźenje po měsće poskićuja wutoru, 19. apryla, w 17 hodź. we Wojerecach. Wot zetkanišća před hrodom powjedźe čara na torhošćo k radnicy, po Dołhej hasy, nimo měšćanskeje cyrkwje a třoch woponowych dubach wróćo k hrodej. Přizjewjenje trěbne njeje. Wobdźělenje płaći na wosobu pjeć eurow, potuńšene tři eura.

Twórby šulerjow widźeć

Budyšin. Pod hesłom „pappesatt“ budu w Budyskej měšćanskej bibliotece přichodne­ tydźenje twórby šulerjow widźeć. Zhotowili su je holcy a hólcy tudyšeho Serbskeho gymnazija we wuměłstwowej wučbje. Wustajeńcu wotewru wutoru, 19. apryla, w 17 hodź. Wona budźe hač dosrjedź meje přistupna.

Znowa za dobry skutk

Łazk. Lětuši beneficny koncert, organizowany wot Gerata Róbla a Towarstwa swj. Filomeny, wotměje so njedźelu, 24. apryla, we Łazku. Budźe to hižo dwanate zarjadowanje tohole razu, kotrehož wunošk wužija za dźěło we wjacorych socialnych zarjadnišćach w bołharskim Razgradźe. Kaž z přeprošenja wuchadźa, wuhotuja program wot 14.30 hodź. mjez druhim kapała Horjany, Měrćin Weclich a Smjerdźečanska rejwanska skupina.

Veröffentlicht in Pokiwy
Bitte anmelden, um einen Kommentar zu posten

Anzeige