Budyšin (SN/JaW). Serbski Sokoł a trenarjej Serbskeje koparskeje wubranki (SKW) muži Frank Ričel a André Strelow wudźeržuja wuske zwiski k serbskim sportowym zjednoćenstwam. To zdźělištaj nam na naprašowanje rěčnik Serbskeho Sokoła Jan Hrjehor a trenar SKW André Strelow. „Rěčimy z trenarjemi a zamołwitymi zjednoćenstwow kaž tež zkandidatkami a kandidatami samymi“, Hrjehor podšmórny. „Zwisk mamy skerje na wosobinskej runinje, koparska scena so znaje. Tež hdyž trenar abo mustwowaj nawodaj wšudźe być njemóža, jim poradźowarjo informacije posrědkuja. Syć je dosć husta, tak zo žanoho dobreho hrajerja njepřewidźimy“, měni André Strelow.