Němsko-pólskemu geoparkej Mužakowski zahork su sobotu na swjedźenskej žurli Mužakowskeho Noweho hrodu oficialnje titul UNESCO Global Geopark spožčili.

Mužakow (SN). „Z tutym wuznamjenjenjom hódnoći organizacija Zjednoćenych narodow za kubłanje, wědomosć a kulturu UNESCO jónkrótne geologiske, hospodarske a kulturnohistoriske wuwiće regiona na mjezy mjez sakskej Běłej Wodu, braniborskim Derbnom a pólskej Łęknicu“, rjekny sakski minister za přirodu Thomas Schmidt (CDU) na přepodaću wopisma. W zwisku z turistiskim zwičnjenjom předstaja pólske a němske geoparkowe towarstwo zhromadnje z komunami zajimawe geologiske městna a temy w formje geošćežkow, a we wopytowarskich srjedźišćach informuja wo zažnych stawiznach zemje.