Lětnje dźiwadło lětsa z dwěmaj trawersomaj
Budyšin (SN/CoR). Razantnje pojědźe István Kobjela alias Benny z wulkim starym Chevroletom na asfaltowany dwór Budyskeho hrodu. Zhromadnje z Kjeldom (Rainer Gruß) chcetaj runje z jastwa pušćeneho Egona (Olaf Hais) wotewzać, a wězo wjeselitaj so hižo na jeho nowy plan. Tutu scenu lětušeho 21. Budyskeho lětnjeho dźiwadła sposrědkowa na wčerawšej nowinarskej konferency prěni zaćišć toho, što na publikum z kruchom „Olsenowa cwólba a wulki pozadnik“ wot 9. junija čaka. Tudyši fanojo danskeje cwólby pak njejsu čakali. Z 30 000 je hižo do premjery nimale 90 procentow zastupnych lisćikow předatych. „Sym přemóženy hladajo na wulki zajim. Boju so, zo njemóžemy wulkemu wothłosej snano wotpowědować“, rjekny intendant NSLDź Lutz Hillmann. Z wulkim wuspěchom bě NSLDź štyrnaće lět hač do 2012 Olsenowu cwólbu pokazowało. Nětko zbywa za nowy, wot Lutza Hillmanna na zakładźe 13 filmow spisany a inscenowany kruch jenož hišće 5 000 zastupnych lisćikow za 35 předstajenjow hač do 17. julija, kaž nawodnica wopytowarskeho serwisa Brigitte Zimmermann zdźěli.