Poradźeny koncert składnostnje 25. róčnicy znowazałoženja ZSST

Budyšin (CRM/SN). Jubilejny koncert składnostnje swojeje 25. róčnicy znowa­załoženja wuhotowa wčera w Budyskim Němsko-Serbskim ludowym dźiwadle Zwjazk serbskich spěwarskich towarstwow (ZSST). Wobdźělene běchu nimale wšitke chóry, kotrež zwjazkej tuchwilu přisłušeja. Tak steješe něhdźe 200 spěwarkow a spěwarjow z dźesać chórow na jewišću. Mjez hosćimi-připosłucharjemi bě tójšto zastupnikow serbskeho žiwjenja kaž tež z politiki, mjez druhim wiceprezident Sakskeho krajneho sejma a prezident Sakskeho chóroweho zwjazka Horst Wehner. Sobotu w Choćebuskej cyrkwi swjateho Mikławša a wčera w Budyšinje su nimale samsny program předstajili. Braniborski kulturny statny sekretar Martin Gorholt wotewrě koncert w Choćebuzu, mjez druhim prajo: „Serbska kultura a dwu­rěčnosć stej žiwe kulturne namrěwstwo. Stej to swójskej znamjeni na juhu Braniborskeje a wonej přinošujetej k atraktiwiće regiona. ZSST přinošuje ze swojim angažementom hižo 25 lět k zachowanju serbskeje kultury we Łužicy.