Spominaja na Jurja Brězana
Budyšin. „Lěta běža přez protyki“ rěka zarjadowanje Ludoweho nakładnistwa Domowina k 100. posmjertnym narodninam Jurja Brězana. Wone wotměje so štwórtk, 9. junija, w 19.30 hodź. w Budyskej Smolerjec kniharni. Tam chcedźa na žiwjenje a literarne tworjenje najwliwnišeho serbskeho spisowaćela 20. lětstotka spominać. Organizatorojo wjesela so na bohaty wopyt.
Wustajeńca k stoćinam
Budyšin. „Kusk žiwjenja“ rěka kabinetna wustajeńca k 100. posmjertnym narodninam Jurja Brězana, kotruž wotewru jutře, srjedu, w 17 hodź. w Budyskim Serbskim muzeju. Program wuhotuja šulerjo Serbskeho gymnazija. Narěč změje Andrea Pawlikowa.
Pytaja pomocnikow
Budyšin. Rěčny centrum WITAJ pyta serbskich młodostnych, kotřiž bychu dwaj tydźenjej prózdninske dźěło w někotrych wuzwolenych pěstowarnjach wukonjeli. Jich nadawk je, so z dźěćimi serbskeje skupiny w serbskej rěči zaběrać. Dźěło budźe płaćene. Zajimcy, starši hač 16 lět, njech so hač do pjatka, 10. junija, w RCW pod telefonowym čisłom 035796 / 550 400 přizjewja.
Kedźbu, Serbja w stolicy!