Wrócław je lětsa europska kulturna stolica. Składnostnje toho wotměje so wot 10. julija hač do decembra wosebita wuměłstwowa akcija w ćahu mjez Drježdźanami a Wrócławjom. Zwjazkowa społnomócnjena za wuměłstwo a medije Monika Grütters projekt spěchuje. Za njón su so wosebje Zhorjelscy politikarjo, zastupjerjo wobchadnych předewzaćow a kuratorojo zasadźeli.
Drježdźany (SN/CoR). W Budyšinje, Lubiju a Zhorjelcu wuměłstwowy ćah po puću ze sakskeje do delnjošleskeje stolicy po planje pozastanje. Zhromadny projekt wuměłskeju wysokeju šulow w Drježdźanach a Wrócławju stara so wo to, zo budźe jězba nětko za pasažěrow hišće zajimawša. Dohromady 25 konkretnych projektow so zwoprawdźi – w ćahu, na stacijach kaž tež w Drježdźanach, Zhorjelcu/Zgorzelecu a Wrócławju.
