Tež serbske dźiwadło Budyskeho NSLDź zhladuje na dobru bilancu
Budyšin (SN/CoR). Z wčerawšim poslednim předstajenjom 21. lětnjeho dźiwadła je so zdobom hrajna doba Budyskeho Němsko-Serbskeho ludoweho dźiwadła 2015/2016 zakónčiła – a to samo z dwójnym rekordom.
Tak je ze 36 963 wopytowarjemi telko ludźi kaž hišće ženje do toho w stawiznach NSLDź lětnju inscenaciju pod hołym njebjom dožiwiło. Kóžde z dohromady 37 předstajenjow wot intendanta Lutza Hillmanna na zakładźe woblubowanych danskich filmow spisaneho a inscenowaneho krucha „Olsenowa cwólba a wulki pozadnik“ bě wupředate. Tež wjedro je k dobremu wuslědkej přinošowało, wšako njetrjebaše ani jedne předstajenje wupadnyć.
Dobre ličby lětnjeho dźiwadła wuskutkuja so tež pozitiwnje na powšitkownu hrajnu dobu NSLDź. Tak je dohromady 160 164 ludźi 958 zarjadowanjow Budyskeho dźiwadła wopytało – rekord tež tole. To je 10 000 wjace hač w sezonje do toho.
