Konserwatorij hudźbnošulski swjedźeń wotměł

Dienstag, 19. Juli 2016
Artikel bewerten
(0 Stimmen)
Jedyn z wjerškow hudźbnošulskeho swjedźenja w Choćebuzu bě wustup šulerskeho orchestra, kotryž nawjeduje Gary Hirche.  Foto: Michael Helbig Jedyn z wjerškow hudźbnošulskeho swjedźenja w Choćebuzu bě wustup šulerskeho orchestra, kotryž nawjeduje Gary Hirche. Foto: Michael Helbig

Choćebuz (mih/SN). „Dom połny hudźby“ bě minjenu sobotu – kaž kóžde lěto posledni kónc tydźenja do wulkich prózdnin w Braniborskej – Choćebuski hudźbny konserwatorij na Promenadźe Puškina. Nimale wšitke ansamble konserwatorija so tam wobdźělichu. Něhdźe 1 200 holcow a hólcow na kubłanišću tuchwilu na instrumenće hrać abo spěwać wuknje. Tak bě lětuši swjedźeń zdobom wukonowa přehladka.

Mjez druhim předstajichu so wjacore skupiny dujerjow wotpowědnje starobje. Wšitke nawjeduje Gary Hirche, kiž ze zakładnej šulu Ericha Kästnera wusko hromadźe dźěła. Mjez wopytowarjemi bě někotryžkuli, kiž je swój čas na hudźbnej šuli dujerski instrument nawuknył a tole hač do dźensnišeho pěstuje, na přikład w cyrkwinskim pozawnowym orchestrje.

Nimo intensiwneje dujerskeje hudźby běchu minjenu sobotu tež cunje zynki słyšeć. We wučbnych rumnosćach w přizemju předstajichu so smyčkarjo, tež ći najmjeńši. Starši mějachu składnosć, so pola wučerjow wo formach wučby wobhonić a jim prašenja stajeć.

Veröffentlicht in Kultura
Bitte anmelden, um einen Kommentar zu posten

Anzeige