Budyšin (SN/mwe). „Za naš kupanski wobłuk mamy hižo lěta krute mustwo sobudźěłaćerjow. To su pjećo přistajeni: dwaj płuwanskej mištraj a třo fachowi sobudźěłaćerjo. Nimo toho mamy třoch wučomnikow. Za Budysku Sprjewinu kupjel su přidatnje wuchowanscy płuwarjo w sezonje zasadźeni, zo by kupjelowy wobchad zawěsćeny był. Nam personal njepobrachuje“, rozłožuje Kerstin Träger, wotrjadnica centralneho běrowoweho managementa Budyskeje wobhospodarjenskeje a wobdźělenskeje towaršnosće.

Kaž w Budyskej Röhrscheidtowej kupjeli je tež w Porchowje abo Kulowje kupanska wěstota zawěsćena. „Tež přichodnje problemy z wuchowanskim płuwarjom njezmějemy“, praji Porchowski wjesnjanosta Sebastian Hein (CDU). Hinak widźi to Uwe Mickel, płuwanski mišter a wuchowanski płuwar w Kulowskej lěsnej kupjeli, kiž je skeptiski nastupajo dorost. „Wosobinsce z dorostom problemy nimam, wšako w Kamjenskej wodowej straži wuchowanskich płuwarjow wu­kubłuju“, wón podšmórnje.