Krajny zjězd Rolanda Ermera za wólby Zwjazkoweho sejma nastajił
Połčnica (SN/MkWj). Budyski wokrjesny zwjazk CDU sćele Rolanda Ermera do klětušeho wólbneho boja za Zwjazkowy sejm. 52lětneho su minjenu sobotu na wokrjesnym wólbnym zjězdźe w Połčnicy nominowali. Cyłkownje štyrjo kandidaća běchu nastupili. Ermer bě so w druhim wólbnym kole přećiwo zapósłanči Sakskeho krajneho sejma Patriciji Wissel přesadźił. Serbska zapósłanča Marja Michałkowa, kiž Budysku kónčinu dotal w zwjazkowym sejmje zastupuje, bě w lěću připowědźiła, zo ke klětušim wólbam hižo njenastupi.
Roland Ermer, pjekarski mišter z Njedźichowa a zdobom prezident sakskeho rjemjeslniskeho zwjazka, chcył so w zwjazkowym sejmje na dobro srjedźnych worštow towaršnosće zasadźeć.
Nimo Ermera běchu serbska žurnalistka Bogna Korjeńkowa (51) z Pančic- Kukowa, wědomostnik Peter Schierack (48) z Kulowa a 41lětna Patricia Wissel z Wjazońcy k wólbam nastupili.