Po tym zo bě Serbski ludowy ansambl – chór, orchester a balet – minjeny kónc tydźenja swój program „Dejmantne a hinaše ptački“ w Choćebuzu, Hochozy a Nowej Niwje wuspěšnje předstajił, móža jón kwasarjo dźensa w Radworju, jutře w Slepom a njedźelu w Kulowje dožiwić. Na wotpowědnje spřihotowanym jewišću wuhladaće wuměłcow SLA stajnje w prawej swěcy. Hudźbnicy, chór a braška su derje słyšeć. We wotměnje ze spěwarjemi temperamentni rejwarjo publikum zawjeseleja.