Pokiwy (10.03.17)

Freitag, 10. März 2017
Artikel bewerten
(0 Stimmen)

Na premjeru do NSLDź

Budyšin. „Za brězami“ rěka najnowša serbska inscenacija NSLDź, kotrejež premjera je jutře sobotu, 11. měrca, w 19.30 hodź. na hłownym jewišću dźiwadła. Pod režiju Lutza Hillmanna hraja Majka Kowarjec, Anna-Maria Bretschneiderec, Měrko Brankačk, Julia Klingnerec, Petra-Marija Bulankec-Wencelowa, Jan Mikan a Jurij Šiman.

Změna programa SLA

Budyšin. Chorosće dla dyrbi Serbski ludowy ansambl předstajenje folklorneho programa „Moja reja!“ jutře, sobotu, w 19.30 hodź. na žurli SLA wotprajić. Předstajenje njedźelu, 12. měrca, w 16 hodź. so kaž planowane wotměje. Hižo kupjene kartki su dale płaćiwe a hodźa so za předstajenje njedźelu abo sobotu, 15. apryla, w 17 hodź. na žurli SLA wužiwać.

Kak štomy wurězować?

Stróža. Zajimcy móža sej wot fachowca pokazać dać, kak maja sadowcy a druhe štomy wurězować. Nawuknyć móža to jutře, 11. měrca, wot 9 do 13 hodź. w Stróžanskim Domje tysac hatow. Telefoniske přizjewjenja su móžne pod čisłom 035 8 93/50 85 71.

Koncert na gymnaziju

Budyšin. W awli Budyskeho Schilleroweho gymnazija wotměje so jutře w 17 hodź. koncert „... und ewig lockt das Weib“. Dźiwadźelnik Měrko Brankačk přihladowarjow na swoje wašnje zawěsće zaso překwapi. Wotpowědnje temje spěwa młody bariton Johannes Hochrein spěwy, w kotrychž so „duša muži chowa“. Znata Budyska pianistka Liana Bertók jeho na křidle přewodźa.

Na jutrowne wiki

Budyšin. Wot 10 do 18 hodź. su lubowarjo debjenych jutrownych jejkow kaž tež jutrownych nałožkow jutře a njedźelu do Budyskeho Serbskeho domu přeprošeni. Kaž kóžde lěto budu tež 26. serbske jutrowne wiki turistam dobra přiležnosć, Serbow lěpje zeznać.

Duchowny koncert

Pančicy-Kukow. Duchowny koncert k póstnemu časej budźe njedźelu, 12. měrca, w 16.30 hodź. w klóštrje Marijinej hwězdźe w Pančicach-Kukowje. Pod hesłom „Z wutrobu a dušu“ zanjesetaj Katrin­ Pehla-Döringowa, sopranistka z Weinböhla, a cyrkwinski hudźbnik Feliks Brojer z Budyšina twórby Telemanna, Bacha, Mendelssohna, Tostija, Coomana kaž tež kompoziciju Brojerja.

Wo móžnosćach poroda

Wojerecy. Lěkarjo a baby kliniki za gynekologiju Wojerowskeje chorownje informuja přichodnych staršich póndźelu, 13. měrca, w 19 hodź. wo porodowych móžnosćach jězorinoweho klinikuma kaž tež wo wotběhach na tydźenskej staciji. Wobsteji přiležnosć, sej porodowe žurle a tydźensku staciju wobhladać. Wot 18 hodź. móža so přichodne maćerje w konferencnej rumnosći „Krabat“ bjezpłatnje fotografować dać.

Na póstny seminar

Smochćicy. Lětuši rjad ekumeniskich póstnych seminarow w Smochčanskim Domje biskopa Bena steji pod hesłom „500 lět reformacija – (žana) přičina swjećenja?“. Temje „Wot 95 tezow k bibliji: Zwadne prašenje wotpusk“ wěnujetaj so póndźelu, 13. měrca, dr. Christoph Münchow z Radebeula a dr. Bernhard Dittrich z Mišna. Posledni wječor w rjedźe lětušich póstnych seminarow budźe 20. měrca na temu „Wot rozwoda k zjednanju: Wizije wo cyrkwi“. Zawodne impulsy k rozmyslowanju poda ekumeniska přihotowanska skupina. Započatk je stajnje w 19.30 hodź. Mjez sobuzarjadowarjemi je Towarstwo Cyrila a Metoda.

Dźěłarnička wo drasće

Chrósćicy. Župa „Michał Hórnik“ přeprosy póndźelu, 20. měrca, we 18.30 hodź. na dźěłarničku „Serbska narodna drasta“ – škrobjenje rubiška, wjazanje bantow a seklow“ na Chróšćansku faru. Nazhonite hotwarniče pokazaja zajimčam, kak so rubiška škrobja abo banty a sekle wjazaja. Dalše informacije poda regionalny běrow Domowiny w Chrósćicach pod telefonowym čisłom 035796/96254.

Veröffentlicht in Pokiwy
Bitte anmelden, um einen Kommentar zu posten

Anzeige