Pokiwy (17.03.17)

Freitag, 17. März 2017
Artikel bewerten
(0 Stimmen)

Wječorne modlenje młodźiny

Njebjelčicy. Byrnjež kubłanske dny w Schmiedebergu byli, přeproša dekanatne dušepastyrstwo wšitkich serbskich młodostnych doma we Łužicy na vesper. Wječorne modlenje je sobotu w 20 hodź. w Njebjelčicach.

Přehladka orchidejow

Slepo. Kaž kóžde lěto budźe tež lětsa na žurli Slepjanskeho Serbskeho kulturneho centruma jutře a njedźelu wot 10 do 17 hodź. přehladka orchidejow a kaktejow. Tójšto nowoplahowanjow z Němskeje a dalšich krajow móža sej zajimcy wězo tež kupić. Wustajerjo poskićeja, zo móža sej ludźo sobu přinjesene orchidejowe rostliny přesadźić dać.

Bazar dźěćaceje drasty

Wojerecy. We Wojerowskej karate-hali na Stauffenbergskej přewjedu jutře wot 9 do 12 hodź. bazar dźěćaceje drasty. Nimo­ drasty poskića tam tež dźěćace wozyčki, rolery, hrajki a podobne wěcy. Katolski dźěćacy dom swj. Hilžbjety so na bohaty wopyt a wulki zajim wjeseli.

Muzej wočakuje hosći

Njeswačidło. Po zymskej přestawce je wot zajutřišeho, 19. měrca, wot 13 hodź. zaso Njeswačanski domizniski muzej přistupny. Zdobom­ wotewru tón dźeń 35. wosebitu wustajeńcu „modelotwar – originalnje napodobnjeny“. Wustajerjej pochadźataj z Wjelećina. Dale předstaja tam wo­pytowarjam nowozhotowjenu swjedźensku drastu Njeswačanskich ewangelskich Serbowkow, kaž chodźachu wone hišće kónc 19. a spočatk 20. lětstotka. Zhotowiła je drastu po originalu Worklečanska šwalča Petra Kupcyna. Wot 13 do 17 hodź. budźe muzej potom kóždu njedźelu wotewrjeny.

Posledni wječor seminara

Smochćicy. Lětuši rjad ekumeniskich póstnych seminarow w Smochčanskim Domje biskopa Bena steji pod hesłom „500 lět reformacija – (žana) přičina swjećenja?“. Posledni wječor budźe póndźelu, 20. měrca, na temu „Wot rozwoda k wujednanju: Wizije wo cyrkwi“. Zawodne impulsy k rozmyslowanju poda ekumeniska přihotowanska skupina. Započatk seminara je w 19.30 hodź.

Dźěłarnička wo drasće

Chrósćicy. Župa „Michał Hórnik“ přeproša zajimcow póńdźelu, 20. měrca, we 18.30 hodź. na Chróšćansku faru na dźěłarničku „Serbska narodna drasta“. Nazhonitej hotowarniči Borbora Jurkowa a Betina Wjeselina pokazatej, kak so rubiška škrobja a banty a sekly wjazaja.

Nowa dokumentacija

Konjecy. Dokumentacija wo narodno-nabožnych pomnikach „Swjate křiže a wjesna kapałka w Konjecach“ je dozhotowjena. Štóž chce sej film wobhladać, ma k tomu srjedu, 22. měrca, w 19.30 hodź. přiležnosć, a to w Konječanskej burskej stwě. Na rozmołwny wječork z Alfonsom Kuringom přeproša Šunowsko-Konječanska Domowinska skupina.

Dalša serbska premjera

Budyšin. Kruch „Raketa“ Envera Husičića, pochadźaceho z Rotterdama, změje štwórtk, 23. měrca, w 19.30 hodź. na małej žurli Budyskeho Dźiwadła na hrodźe swoju serbsku premjeru. Lubina Haj-duk-Veljkovićowa je hru přełožiła, a hladajo na předłohu zwaži so elewka Anna Zacharijasojc z režiserom Ralphom Henselom na eksperiment.

Akademija wo ludowej reji

Budyšin. Přichodne zarjadowanje Maćičneje akademije wotměje so štwórtk, 30. měrca, w 19.30 hodź. w Budyskim „Wjelbiku“. Tam přednošuje wědomostna sobudźěłaćerka Serbskeho instituta dr. Theresa Jacobsowa na temu „Serbska ludowa reja – imaterielne kulturne herbstwo“. Přednošk budźe w serbskej rěči, zastup je darmotny.

Veröffentlicht in Pokiwy
Bitte anmelden, um einen Kommentar zu posten

Anzeige