Mejski swjedźeń DGB z rjećazom ludźi přećiwo prawicarjam
Budyšin (SN/at). Po wšej Sakskej wuhotowa Němski zwjazk dźěłarnistwow (DGB) wčera mejske swjedźenje pod hesłom „Smy mnozy, smy jedni“. Budyske mejske zarjadowanje na Žitnych wikach pak bě lětsa tróšku hinaše, a tohodla je wjace ludźi na Žitne wiki přišło, hač bě to minjene lěta wobkedźbować. Budyšenjo chcychu 1. meje jasny signal do cyłeho kraja słać, zo njeje jich město „městno nacijow“. Wšako je strona NPD nimale paralelnje na Drjewowych wikach mejsku manifestaciju pod hesłom „Socialny stat za Němcow město swětoweho socialneho zarjada za cuzych“ přewjedła.