W Schleswigsko-Holsteinskej wola njedźelu nowy krajny sejm. Wolerjo móža mjez kandidatami z 13 stron a wólbnych zjednoćenstwow rozsudźić. Wo dobry wuslědk wojuje tež Južnoschles­wigski wolerski zwjazk (SSW), kotryž twori hromadźe z SPD a Zelenymi tučasne krajne knježerstwo.

Flensburg (SN/at). Krajna lisćina SSW wopřijima mjena wosom žonow a 15 muži. Načolna trójka Lars Harms, Jette Waldinger-Thiering a Flemming Meyer přisłuša hižo w nachilacej so wólbnej periodźe krajnemu sejmej w Kielu. SSW sadźa na wobstajnosć, přiwšěm su mjez prěnimi dźesaćomi lisćiny třo młodźi ludźo. Načolny kandidat Harms je w rozmołwje ze Serbskimi Nowinami dobreje nadźije, „snano přez wurunanski mandat dalšeho kandidata, 35lětneho Christiana Dirschingera, do parlamenta dóstać“. Z Christopherom Andresenom (19, městno 7) a Henriettu Boysen (městno 10), 18lětnej dźowku Thede Boysena, bywšeho nawody mjeńšinoweho sekretariata, signalizuje SSW młodym wolerjam, zo tež jich zajimy chutnje bjerje.