Praha (SN). Mjezynarodne knižne wiki w čěskej stolicy zahajichu so dźens dopołdnja na znatej městnosći w Přemysłowym palasće Praha-Holešovice. Třia­dwacety króć wuhotuje Zwjazk čěskich knihikupcow a nakładnikow „Svět knihy“ – a to z rosćacym wobdźělenjom ze wšeho swěta. Temy lětušeje přehladki su „Genius loci w literaturje“, „Kniha jako objekt“ a słuchoknihi. Runočasnje wotměwa so literarny festiwal.

Wot spočatka je Ludowe nakładnistwo Domowina mjez tamnišimi stajnymi wustajerjemi. Kóždolětnje wužiwaja wosebje čłonojo Towarstwa přećelow Serbow móžnosć, so na městnje wo nowostkach nakładnistwa informować. Slovenska biblioteka a dalše knihownje sej tele dny swój wobstatk słowjanskeje litera­tury z wudaćemi LND wudospołnjeja. Na 100 titulow LND sobu wzało.