Město Choćebuz reaguje na přiběrace problemy w scenowych kónčinach

Choćebuz (dpa/SN). Město Choćebuz njewě sej hinak pomhać: Wino, piwo, palenc a dalše alkoholiske napoje su wotnětka w dźělach nutřkowneho města w zjawnosći zakazane. Wotpowědny zakaz je wot dźensnišeho płaćiwy, najprjedy raz hač do oktobra, a to cyły dźeń.

Hłowna přičina su pohórški wobydlerjow, dokelž dyrbja sej wot wšelakich skupin lózyskosće a samo wohroženja lubić dać. Při tym hraje alkohol wulku rólu. Stajnje zaso dyrbješe policija přijěć, dokelž bě samo k ranjenjam ćěła a wobškodźenjam dóšło.

Miljej pičkow, drogowa scena, młodostni, prawicarscy ekstremisća a migranća – wšitcy so tam zetkawachu, hdźež nětko zakaz města płaći. Wospjet běchu tam namócne rozestajenja, kotrež měrjachu so tež přećiwo wukrajnikam. We wječornych hodźinach bě policija masiwnje prezentna, wosebje w problemowych kónčinach, hdźež je alkohol nětko tabu: Su to měšćanska hala a naměsto před njej, měšćanska promenada podłu měšćanskeje murje, Puškinowy park z promenadu kaž tež areal wokoło statneho dźiwadła.