Čitajće w nowym rozhledźe (30.06.17)

Freitag, 30. Juni 2017
Artikel bewerten
(0 Stimmen)

Prezident Europskeho parlamenta Antonio Tajani wotmołwja tydźensce wosobinsce na jedne z prašenjow, kotrež wobydlerki a wobydlerjo parlamentej sćelu. Jeho sobudźěłaćer Markus Warasin wopisuje, kak to wotběži: „Na prašenja woby­dlerjow wotmołwja swójska parlamentowa słužba. Nimo něhdźe 6 000 namołwow wo podpěru dóstachmy w aprylu 121 listow z prašenjemi na prezidenta. Často jewja so podobne temy: Něhdźe 35 procentow prašenjow bě k brexitej, dalšich něhdźe 30 procentow k migraciji. Tež ćežišćo wonkowneje politiki so husto jewi. Ze słužbu za naprašowanja wupytamy zwjetša wjetše prašenja za prezidenta. Wón raz jednu, raz tamnu temu sam wobdźěła. K mjeńšinam njemějachmy dotal hišće žane prašenja, ale měło-li tajke přińć, budźemy so wězo z nim zaběrać.“

Warasin dźěła w kabineće prezidenta a ma jeho mjez druhim hladajo na rěčne mjeńšiny poradźować. W nowym wudaću Rozhlada wón powěda, čehodla relewanca mjeńšinoweje tematiki z jeje widźomnosću přiběra, a rozkładuje, zo móže parlament mjeńšinam předewšěm ze symboliskej podpěru pomhać a jeli so konsekwentnje za mjeńšinowe temy angažuje.

Lětuše dwójne wudaće kulturneho časopisa wobsahuje rjany wuběr literatury z twórbami Róže Domašcyneje, Sylwije Šěnoweje, Měrćina Wjenka a Źilki.

Gregor Kliem je so w Šotiskej na keltiske slědy podał. Wo Janu Awgusće Měrćinku, kiž bě so jako tołmačer na łódźi „Investigator“ na slědy podnurjeneje łódźe Sira Franklina nastajił a na kotrehož 200. narodniny w awgusće spominamy, je Lubina Malinkowa tójšto zajimaweho wuslědźiła. Jakub Sokół zaběraše so z diskusijemi wo wutworjenju serbskeho wokrjesa za čas politiskeho přewróta. Jill-Francis Ketlicojc zezna Krakowske towarstwo „Willa Deciusza“ a rozprawja wo jeho­ dźěławosći na polu spěchowanja demokra­tiskeho myslenja, dialoga kul­turow, historiskeho herbstwa a načasneho wuměłstwa. Nicole Dołowy-Rybińska předstaja wšelake wašnja aktiwizma młodostnych rěčnych mjeńšin Europy.

Wšěm čitarjam a čitarkam přeju rjane lěćo a poručam wam Rozhlad jako dowolowu lekturu. Wjeselu so z přichodnym wudaćom w septembrje zaso na was.

Sara Mičkec

Veröffentlicht in Serwis
Bitte anmelden, um einen Kommentar zu posten

Anzeige