Husto bě element woda lětsa w medijach zastupjeny, a tež Rozhlad ma wodu za tak elementarnu, zo je jej cyły zešiwk wěnował.

Do časopisa wita nas Roman Wjesela ze swojimi myslemi wo kołoběhu wody w małkim a we wulkim. Na wodu hladaja z cyle wšelakich pozicijow Franciska Smolic, kotraž da nam dohlad za kulisy oratorija „Wulkotna woda“, Jan Kral, kiž předstaja nam Róžeńčansku Marijinu studničku, Wito Sćapan, hdyž dožiwja z nami wosebitu křćeńcu a Jill-Francis Ketlicojc. Wona přeproša nas do krajiny hatow we Łukajcynym dole na wobkedźbowanje flory a fawny w tutym drohotnym biotopje.

Nic za wšěch wšak je woda žohnowanje: biblioteki a archiwy sej włóžnotu njepřeja. W seriji SI zhonimy wot dr. Annett Brězanec a Anny Měrćinoweje wo dźěławosći a stawiznach Serbskeho kulturneho archiwa a Serbskeje centralneje biblioteki.

Celina Knopec a Hana Nukec stej poskitk carsharinga testowałoj

Swójske awto słuša za mnohich ludźi cyle samozrozumliwje k wšědnemu žiwjenju. Wone steji w garaži a je kóždy čas k dispoziciji, chceš-li spěšnje nakupować, sej na termin abo hdźežkuli dojěć. Runočasnje pak je swójske jězdźidło tež z kóštami a zamołwitosću zwjazane. Zawěsćenje, dawki, reparatury, hladanje, techniske přepruwowanje (TÜV) a ćěriwo dyrbja so zapłaćić. Tola runje ludźo, kotřiž awto wšědnje njewužiwaja, so často prašeja, hač je swójske jězdźidło woprawdźe trěbne. W Budyšinje su na dwěmaj stejnišćomaj cyłkownje tři awta k dispoziciji, kiž móže kóždy po potrjebje wužiwać. Tale posłužba mjenuje so carsharing. Chcychmoj wjac wo tym wědźeć a smój sej poskitk předewzaća „teilAuto“ dokładnišo wobhladałoj.