W minjenej hrajnej dobje w Delnjej Łužicy wuspěšna inscenacija „Nic so smjeć!“ dožiwi jutře, sobotu, swoju hornjoserbsku premjeru­ w Budyskim Dźiwadle na hrodźe. Komedija z pjera znateho chorwatskeho awtora Mira Gavrana lubi tež w přełožku Lubiny Hajduk­-Veljkovićoweje publikumej razantny, amizantny a překwapjacy dźiwadłowy wječor. Foto: Mirosław Nowotny

Raduš (SN). Wosebita wustajeńca „Silberrausch und Berggeschrey – Archäologie des mittelalterlichen Bergbaus in Sachsen und Böhmen“ na Radušanskim słowjanskim hrodźišću je chětro wuspěšna. To zdźěla towarstwo Słowjanske hrodźi­šćo Raduš. W meji wotewrjena přehladka pokazuje mnohe originalne, předewšěm drjewjane namakanki, pochadźace ze srjedźowěkowskich podkopkow pola Dippoldiswaldy a Niederpöbela w Rudnych horinach. Nětko, w nazymskich prózdninach, kotrež budu wot póndźele tež w Braniborskej, wočakuja tam 30 000. wopytowarja.

„Jara wuspěšna je wustajeńca awdioguida dla, hdźež namakanki z mnohimi filmami a animacijemi rozłožeja“, wujasnja Anja Bodschwinna, „přehladka so tuž za swójby z dźěćimi derje hodźi.“ Hač do kónca měsaca hišće je prezentacija wšědnje wot 10 do 18 hodź. přistupna.

Po tym zo maja we Wojerecach a Kulowje hižo dlěši čas zjawnu knižnu chěžku, su nětkole tež w Budyšinje tajku wotewrěli. Na knižnu chěžku přetwarjena telefonowa chěžka steji na Póstowym naměsće. Nastorčiła je projekt swójbna přirada sprjewineho města. Wosebje angažowała je so při tym Birgit Kieschnick. Trěbnych 2 000 eurow su z pjenježnych darow nałožili. Kóždy móže sej nětko knižku z chěžki wzać abo knižku do njeje stajić. Knižki zaso wróćić njeje winowatosć. Foto: Carmen Schumann

Prěni dźěl naprašowanja čitarjow Ludoweho nakładnistwa Domowina (LND) je so zašły tydźeń ze štyrjomi rozmołw­ny­mi kołami w Budyšinje a Choćebuzu zakónčił. Kaž šef firmy DIMA wične slě­dźenje w Mannheimje, kotraž naprašowanje čitarjow w nadawku LND přewjeduje, Frank Diesing zdźěli, su wob­dźěl- nicy čile a z wulkim angažementom wo wudźěłkach nakładnistwa diskutowali. Woni mějachu tójšto temow, kotrež jim na wutrobje ležachu. W Mannheimje rozmołwnej kole tuchwilu wuhódnoćeja. Zdobom přihotuje DIMA druhi dźěl napra­šowanja, kotryž telefonisce mjez čita­rjemi přewjedu. Za nje móža so zajimcy hišće hač do pjatka, 16. oktobra, w DIMA přizjewić, a to pod telefonowym čisłom 0621 / 18 03 68 - 17 abo z mejlku na . Telefoniske interviewy budu potom kónc ok­tobra a traja něhdźe 15 mjeń­šin. Mjez wšitki­mi wobźělnikami napra­šowanja wulosuja wjacore myta, dobropisy w hódnoće 25 eurow.