Pohladnicy powědaja wo dawnych časach, swědča wo podawkach a ludźoch. Alfons Handrik wotkrywa nam swět, na kotryž smy w minjenych lětach nimale pozabyli.
Pohladnica ze Sernjanskim hrodom dopomina na zajimawe stawizny delanskeje wsy z dźensa něhdźe 180 wobydlerjemi. Jeno starši ludźo wědźa so na tamniši hród dopominać, mjeztym zo ći młódši lěta 1981 zwottorhane twarjenje wjace njeznaja.
Prěnjotnje naspomnjene buchu Sernjany 1419 jako Czscherna. W chronikach je zapisane, zo steješe tam w zažnym srjedźowěku južnje mjeztym zapołoženeho sydlišća při Klóšterskej wodźe wodowy hród. Wot 16. lětstotka bě w Sernjanach knježi dwór, a prěni wobsedźer knježeho kubła wot 1513 hač do 1540 rěkaše Jakob von Baudissin. Hač do lěta 1852 je kubło z hrodom 18 razow wobsedźerja měnjało. Hač do 1715 bě tam tři lěta kralowsko-pólski a kurwjerchowsko-sakski podpołkownik Hans von Rutt ryćerkubler. 150 lět pozdźišo hišće je Arnošt Muka w Sernjanach naličił 160 wobydlerjow, a to bjezwuwzaćnje Serbow.
