Serbšćina jedna ze šěsć rěčow přepytowanskeho programa SMiLE

Washington/Waršawa/Budyšin (SN/CoR). Serbšćina je jedna ze šěsć europskich mjeńšinowych rěčow, kotrež su zapřijate do slědźerskeho programa ameriskeje institucije Smithsonian Center for Folklife and Cultural Heritage we Washingtonje. Pod hesłom „Sustaining Minority Languages in Europe (SMiLE)“ bě Smithsonian spočatk lěta šěsć projektow wo pospytach rewitalizacije rěčow w Europje wupisała. Přirunać tele iniciatiwy wohroženych rěčow steji w srjedźišću přepytowanskeho programa, kotryž wotměwa so w zhromadnym dźěle z mjeńšinu. Spočatk nowembra nětko wozjewichu, zo wopřijima program SMiLE nimo serbšćiny tež galicišćinu w Španiskej, iršćinu w Irskej, sewjerofrizišćinu w Němskej, okcitanšćinu w Francoskej a grjekšćinu w Italskej.