Bilanca lětušich nazymskich koncertow relatiwna

Budyšin (SN/CoR). Ličby su relatiwne, móžeš je tak a hinak interpretować. To płaći tež za bilancu lětušich nazymskich koncertow, wotmětych we Worcynje, Njebjelčicach, Turjeju, Radworju, Chrósćicach, Slepom, Budyšinje, we Wojerecach, w Bukecach a w Pančicach-Kukowje. Tak je dohromady 745 ludźi dźesać zarjadowanjow rjadu z dołhej tradiciju w Hornjej a Delnjej Łužicy dožiwiło. Přerěznje je to něhdźe 75 wopytowarjow na koncert. Přirunuješ-li absolutnu ličbu z tymaj minjeneju lět, pokazuje so negatiwny trend nastupajo nazymske koncerty: mjenje zarjadowanjow, mjenje publikuma. Tak přińdźe loni hišće 925 ludźi na 14 koncertow, w lěće 2015 bě jich tež nimale tysac wopytowarjow na runje telko zarjadowanjach. Rěka pak to tež, zo zajim za nazymske koncerty woteběra?